Ibhanga le Central African Building Society-CABS, elikhangelane lokunika osomabhizimusi imali yokuvuselela amafekithali asebhidlika libikwa selivumile ukuyekethisa iziqondiso zohlelo lokukweledisa olwe Distressed and Marginalized Areas Fund.
Unkosikazi Ntombenhle Moyo umgcinisihlalo we Zimbabwe National Chamber of Commerce koBulawayo uthi ibhanga leli selibonile ukuthi amankampani amanengi angeke athole imali ayifunayo esikhwameni seDistressed Fund eyizigidi ezngamatshumi amane amadollar eMelika nxa kulandelwa imithetho yamabhanga ejulileyo yokuboleka imali.
Unkosikazi Moyo uthi osomabhizimusi sebemelele ngamehlo abomvu ukuthi kwethulwe umbiko lo libhanga leli lohulumende njengoba amankampani amanengi ethwele nzima ngokuswela imali yokwenza imphahla etshiyeneyo.
Ibhanga leli lifuna ukuthi osomabhizimusi abafuna imali le baveze ingwalo ezijulileyo zokwenza kwabo imali okweminyaka embili, babe ngamalunga enhlanganiso ezilembali ehloniphekayo njalo babelempahla ebambekayo.
Amankampani angamatshumi ayisitshiyangalombili avala koBulawayo kusukela ngomnyaka ka 2009 ngenxa yokuswelakala kwemali abantu abazinkulungwane ezingamatshumi amabili baphelelwe ngumsebenzi.