Izakhamizi endaweni ezitshiyeneyo zelizwe zithi seziphoqwa yisimo sendlala ukuthengela izifuyo zazo ukudla okugoqela utshani lesikuba ngoba akuselamadlelo, kanti amadamu amanengi lawo asesitsha.
Isiqhuma sotshani esisodwa sibiza amadola aseMelika aphakathi kwamabili alengxenye, US$2.50 kusiya kumadola amahlanu, US$5.
Isaka lokudla okugayiweyo kumbe isikuba, kusiya ngohlonzi, libiza amadola angamatshumi phose amabili, US$18 kusiya kumatshumi amabili lantathu, US$23.
Udubo olukhona ngolokuthi obunye utshani obuthengiswayo buyabe bulezinto eziyingozi ezilakho ukubulala izifuyo zingazidla ezifana lama-plastic lamawaya.
Ingcwethi kwezokufuya uMnu Mandla Nkomo uxwayise abalimi kungxoxo ayenze leStudio 7 ukuthi kumele baqaphele ngoba belakho ukufelwa yizifuyo bona besithi bayazihlenga endlaleni.
Your browser doesn’t support HTML5
Ingxoxo loMnu Mandla Nkomo