Ibandla elikhokhelwa nguMongameli weMelika uMnu Barack Obama elama Democrats selihluthunelwe intambo zokukhokhela idale leHouse of Representatives libandla lama Republicans kukhetho olwenziwe ngoLwesibili.
Ibandla likaObama lilahlekelwe yizihlalo ezedlula ezingamatshumi ayisithupha, 60 kodwa lenelisa ukugogodlela kuzihlalo zalo zedale laphezulu ele Senate.
Lokhu kutsho ukuthi ama Republicans yiwo asekhokhela idale laphansi njalo ama Democrats wona azaqhubeka ekhokhela ele Senate. Ngaphambilini kokhetho lolu, ama Democrats yiwo ekade ekhokhela amadale womabili.
Omunye wabanqotshiweyo kubandla lama Democrats nguMnu Russ Feingold obengu Senator we Wisconsin.
UMnu Feingold waziwa ngokukhuthaza umbuso okhululekileyo eZimbabwe lokukhokhela imizamo yokwesula umthetho owafakela eleZimbabwe izijeziso oweZEDERA.
UMongameli Obama utshayele ama Republicans ihlombe wavuma ukuthi ibandla lakhe linqotshiwe. Ingcwethi zithi ukusilela kwemisebenzi lokonakala komnotho weMelika yikho okubangele ukuba uzulu avotele ama Republicans. Ukuvuma kuka Obama ukuthi ibandla lakhe linqotshiwe yinto ebukwa kakhulu ngabanengi abathi lokhu kuveza sobala ukuthi eMelika kulombuso okhululekileyo.
Lokhu kwenzakala nje iziphathamandla zeZanu PF, ezigoqela uMnu Simon Khaya Moyo, uMnu Dydimus Mutasa loMnu Emmerson Mnangagwa zisithi ibandla leli alisoze lisuke embusweni lanxa lingaze linqotshwe kukhetho oluzayo.
Ukuqathanisa indlela ukhetho oluqhutshwa ngayo eMelika leZimbabwe sixhume ingcwethi ecubungula ezombusazwe uMnu Brilliant Mhlanga.