Ibandla le People’s Democratic Party (PDP) elikhokhelwa nguMnu. Tendai Biti owayengunobhala jikelele webandla leMDC-T uthi kumele ibandla likaMnu. Morgan Tsvangirai liyekele ukuzenza umaqhuzu kwezombusazwe eZimbabwe.
Umkhokheli webandla leMDC-T umnumzana Morgan Tsvangirai
Ibandla leli likhuluma lokhu kulandela ukwala kwayo ukubayingxenye yamabandla agoqela iMDC-T alobe ugwalo lokukhuthaza iZimbabwe Electoral Commission ukuthi iguqule indlela enziwa ngayo ukhetho elizweni.
Ibandla leli lithi iMDC-T izenza ubhudi omdala isikhathi sonke okwenza ukuthi amanye amabandla acine esehluleka ukusebenza layo lamanye amabandla.
Ugwalo lweElectoral Reforms Agenda lokhuthaza ukuthi kulungiswe indlela ezibalulekileyo zokuqhuba ukhetho kungakafiki umnyaka ka2018 okuzakwenziwa khona ukhetho olukhulu eZimbabwe. Amabandla aphikisayo athi ukhetho olwenziwa eZimbabwe okwamanje lusekelana lebandla leZanu PF.
Abezombusazwe belobelana isivumelwano sokusebenzelana
Kodwa-ke iZanu PF ithi amabandla la asenga ezimithiyo. Ukuze sihlaziye udaba logwalo lweElectoral Reforms Agenda iStudio 7 ixoxe loMnu. George Mkhwananzi umsekeli wesikhulumeli sebandla lePDP kanye loNkosazana Thabitha Khumalo, umsekeli wesikhulumeli sebandla leMDC-T.
UMkwananzi uthe okusindayo yikuthi amanye amabandla ayenza engani yiwo azibambe esidukwini eZimbabwe.
“Kulamanye amabandla athi nxa eqhuba konke lokhu azenze omaqhuzu ngakho-ke kumele babekwazi ukuthi akumelanga benze njalo.”
Umsekeli wesikhulumi seMDC-T uNkosazana Thabitha Khumalo
UNkosazana Khumalo umphendule esithi kumele amabandla asebenze ndawonye ukwenzela ukuguquka indlela okuvotwa ngayo eZimbabwe.
Your browser doesn’t support HTML5
Ingxoxo Esiyenze LoNkosazana Thabitha Khumalo LoMnu. George Mkhwanazi