Ibandla leZanu PF kusobala ukuba lifisa ukubisela uMongameli Emmerson Mnangagwa esikhundleni ngokhetho oluzakwenziwa ngomnyaka ka2028.
Okwamanje abatsha abakubandla leli sebeqalile ukukhankasela ukuba angene esikhundleni lesi loba esesebenzela isigaba sakhe sesibili esewofisini likamongameli elingelokucina njengalokhu okukuphawulwa yisisekelo sombuso welizwe.
Banengi abakubonayo lokhu abathi kabasoze bavume ukuba ibandla elibusayo likwenze.
Okwamanje sebetshaya isilogani abatsha kubandla leZanu PF besithi uMnangagwa kumele ancintise kukhetho ngomnyak ka2028 loba isisekelo sombuso welizwe sivimba ukuba akumelanga edlulise iminyaka eyisitshiyangalombili esesikhundleni.
Isikhulumeli sebandla leZanu PF, uMnu. Farai Mharapara, uthi kabakakhulumisani ngodaba lolu kodwa wonke umuntu ulelungelo lokukhankasela ukuba uMnangagwa abuyele esikhundleni.
Okkhokhela inhlanganiso yabalwa impi yenkululeko eyeZIPRA Veterans Association, uMnu. Buster Magwizi, uthi kumele umbuso wabelwane hatshi ukuba uMnanganga abuse aze agugele ewofisini.
UMnu. Nhlanhla Moses Ncube unobhala jikelele wenhlanganiso yeFreedom Alliance ukhuza imhlolo ngokufiswa libandla elibusayo.
USikhwicamfundo Lovemore Madhuku, ingcwethi kwezomithetho njalo okhokhela ibandla leNational Constitutional Assembly uthi akulunganga okwenziwa libandla leZanu PF.
Banengi abathi kubi kakhulu okwenziwa libandla elibusayo loba kusekelwa ngamalungelo ebandla leli.
SEE ALSO:
Udaba Esilwethulelwe NguGibbs Dube