Inhlanganiso ekhankasela ukulondolozwa kokuthula, iZimbabwe Peace Project (ZPP) ithi ibandla leZanu PF lisebenzisa ukudla ukudinga usekelo.
Abasekeli bamabandla aphikisayo bayakuncitshwa lokhu kudla njalo batshelwa ukuthi kumele baze kuZanu PF nxa bengafuni ukubulawa yindlala.
“Abantu abanengi abamele bathole uncedo lokudla lezinye izinto, abakutholi ngenxa yokuthi kabasekeli ibandla elibusayo,” kuchaze umqondisi weZPP uNkosazana Jestina Mukoko.
UMukoko ubegcizelela umbuko oyethulwe yinhlanganiso yakhe ngoLwesibili, wona oveze njalo ukuthi ukudlephana kuyaqhubeka kubandla leZanu PF lakuMDC-T, amalunga amabandla la ebanga izikhundla.
Your browser doesn’t support HTML5
Ingxoxo loNkosazana Jestina Mukoko
Asenelisanga ukukhuluma lesikhulumeli seZanu PF uMnu Simon Khaya Moyo.
Kodwa ibandla leli selike lakulandula ngaphambilini ukuthi lisebenzisa ukudla ukudinga usekelo ebantwini.
“Abantu kumele bafunde ukukhuluma iqiniso,” kutsho ummeli wePelandaba-Mpopoma edale lephalamende uMnu Joseph Tshuma kungxoxo ayenze leStudio 7 kunsukwana ezedluleyo.
“Ukhona umuntu ongabanjwa ngamandla shuwa laye avume? Akula muntu othengwa ngama rice lokunye ukudla lokhu okukhulunywayo,” uqhubeke echasisa uTshuma.
Your browser doesn’t support HTML5
Ingxoxo loMnu Joseph Tshuma