Inkhokheli yamabandla ezombusazwe, iziphathamandla zikahulumende, inhlanganiso ezizimeleyo, izihlobo labangane babuthene esililweni sika muyi uMnu. Edgar Tekere, obhubhe ngoLwesibili esibhedlela se Murambi Clinic eMutare, ngemva kokulwisana lomkhuhlane we mvukuzane.
Lokhu kwenzakala ibandla le ZANU PF lilokhu lisacubungula ukuthi umuyi uTekere, yena owatshiyana lebandla leli ngenxa yokwehlukana kwembono wabumba elakhe ele ZUM, engaphiwa inhlonipho yokuba liqhawe lesizwe na.
Umuyi ukhangelelwe ukungcwatshwa kuyonale impelansonto. Amabandla ezombusazwe kanye lenhlanganiso ezizimeleyo sezikhuthaze ukuthi umuyi aphiwe inhlonipho yokuba liqhawe lesizwe.
Ibandla leZANU PF esigabeni seMutare selivumelene ukuthi umuyi aphiwe linhlonipho, njalo iPolitburo yalelibandla ibikwa izamelela ukuthola imbono kungatsha zayo zonke elizweni andubana ikhuphe isinqumo.
Ukuze sizwe okunengi ngaloludaba, iStudio 7 ixoxe loMnu. Alois Dzvairo, isiphathamandla se National Constitutional Assembly, enye yenhlanganiso ezibabaza ubuqhawe bukamuyi uMnu. Tekere.