Sekubunjwe uhulumende womanyano kwele South Africa ozabusa lelolizwe okweminyaka emihlanu elandelayo. Lokhu kulandela ukhetho olusanda kuqhutshwa okungelabandla elinqobileyo.
Ibandla elibusayo kwele South Africa eleAfrican National Congress likhethe ukungena kuhulumende womanyano lebandla leDemocratic Alliance, Inkatha Freedom Party lePatriotic Alliance.
Lumanyano uvezwe ngesikhathi iphalamende entsha kwele South Africa ihlala okwakuqala lamalunga ayo egcotshwa okwakuqala. UMnumnzana. Cyril Ramaphosa nguye ohle wakhethwa ngamabandla la ukuba ngumongameli welizwe.
UNkosikazi Thokozile Didiza owebandla leANC nguye okhethwe ukuba ngusomlomo wephalamende kwathi unkosikazi Anneli Lotriet owebandla leDA wakhethwa ukuba ngumsekeli wakhe.
Esekhuluma ngalo umanyano, unobhalala jikelele webandla leANC, UMnumnzana Fikile Mbalula, uthe ubunjwe ngemva kokukhulumisana okujulileyo.
“I-ANC iyawahlonipha amabandla onke okwenza isivumelwano esiqakathekisa abantu beSouth Africa lezidingo zabo.”
Umkhokheli webandla leDA, uMnumnzana John Steenhuisen, uchaze umanyano omutsha njengethuba elitsha lokuthuthukisa eleSouth Africa.
“Siyathemba ukuthi uhulumende womanyano lo lithuba elihle kulizwe lethu ukuthi lithuthuke njalo sisebenze sonke ukuvikela inkululeko yethu.”
UMnumnzana Velenkosini Hlabisa okhokhela ibandla leIFP laye uncome kakhulu lumanyano.
“Sizaba yingxenye yalo uhulumende ngoba yikho okufiswa ngabantu bakithi abafuna kuqedwe inhlupho zabo.”
Ngakolunye uhlangothi ibandla leEFF, elingangenanga kulo umanyano lihlangene lamanye amancane lobanje izihlalo zabo zephalamende zingafiki amatshumi amahlanu (48) kukanti ibandla leUmkhonto weSizwe alikavezi ukuthi lizakuba kuliphi icele lezihlalo zalo ezingamatshumi amahlanu lasitshiyagalombili (58).
Intatheli yeZimbabwe uMxolisi Ncube uthi lobanje lumanyano kukhanya umuhle kakhulu kuntuthuko yezomnotho weSouth Africa, kulokukhathazeka kwezinye izizalwane zeZimbabwe.
“Liyazi lonke ukuthi iPatriotic Alliance libandla elicampaigne kakhulu ukuthi abantu bokuza abahambe. Umkhokheli waleli bandla uGayton Mckenzie ubethi akufuna kakhulu nxa engangena kuhulumende yikuthi abantu bokuza abahambe ethi kumele kucitshwe imitshina yelife support esiza abantu bokuza ezibhedlela.”
Umgcinisihlalo wenhlanganiso yeZimbabwe Community in South Africa, uMnumnzana Ngqabutho Mabhena, uthi okubathokozise kakhulu yikwamukela impumelo yokhetho kwenengi lamabandla abencintisa.
UMabhena uthi akukho okubi ngomanyano lo owethuliweyo kodwa okunengi yizifundo okufanele zifundwe ngamabandla ezombusazwe eZimbabwe.
“ESouth Africa esikufundayo yikuthi abazange badinge umuntu wangaphandle ukuthi abancedise. Bayazikhulumela bona bodwa. Lathi siyizizalwane zeZimbabwe kumele sivumelane ukuthi ukhetho silubamba njani njalo sihloniphe impumela yokhetho. Nxa impumela isitsho ukuthi kumele sibambe uhulumende womanyano kumele sikwenze ukwenzela ukuthi ilizwe liyephambili.”
Kukhangelelwe ukuthi uMongameli Cyril Ramaphosa uzagcotshwa kunsukwana ezimbalwa ezilandelayo okuzalandelwa yikubunjwa kwedale labaphathintambo abalamalunga avela kumabandla onke akuhulumende womanyano.
SEE ALSO:
Udaba Esilwethulelwe nguThuso Khumalo