Ibandla le ZANU PF ngoLwesithathu livimbe ngamandla wonke ukuthi idale lephalamende liqalise ukukhuluma ngobusela lokungasebenzi ngemfanelo okuphose kwadiliza ibhanga elikhulu lelizwe iReserve Bank of Zimbabwe.
UMnu. Paddy Zhanda umgcinisihlalo wekhomidi yedale leli ebona ngokusetshenziswa kwemali kahulumende, ubikwa ehluleke ukwenza lokhu ngenxa yokuthi abanye bakhe abe ZANU PF bathe kungabafaka enkingeni.
UZhanda katshelanga idale leli ukuthi wekeleleni ukuthi kufakwe engwalweni lokuhluza okwenziwa ephalamende olwe Order Paper ukuthi kungakhulunywa ngokwenzakala ebhanga leRBZ.
Ibhanga leRBZ letheswa icala lokuqhuba imisebenzi engaqedakaliyo ibandla le Zanu PF lisabusa lodwa okwaphose kwaliwisela phansi.
Ibhanga leli laphinda letheswa umlandu wokusebenzisa kungelamvumo imali yamankampani lenhlanganiso ezizimeleyo eyayigcinwe emabhanga.
Umnu. Edward Mkhosi okhokhela iqula lamalunga edale lephalamende awebandleni le MDC elikhokhelwa nguMnu. Welshman Ccube uthe udaba lolu luzahlafunwa ephalamende ngenkani.
Umnu. Bekithemba Mhlanga ingcwethi kwezenotho uthi loba nje udaba lolu lungahlafunwa ephalamende kungeke kwaguqula lutho loba ukujeziswa kwalabo abadlelana lebandla le Zanu PF.
