Ibandla leMDC elikhokhelwa nguMnu. Nelson Chamisa lithi licabangela ukuthi abantu bakhahlanyezwa ngamasotsha langamapholisa ukwenzela ukuthi ibandla leli livume ngenkani ukungena kuhulumende womanyano njengalokhu okwenziwa yiZapu ngomnyaka ka1987.
Iziphathamandla zebandla leMovement for Democratic Change (MDC) ezimbalwa zitshele iStudio 7 ukuthi kusobala ukuthi uhulumende kaMongameli Emmerson Mnangagwa usebenzisa amapholisa lamasotsha ukwenzele ukuthi kubelohulumende womanyano.
Iziphathamandla zebandla leZanu PF zitshele iphephandaba leHerald ukuthi ukutshengisela okwenziwe ngabantu emigwaqweni kwenziwe libandla leMDC elifuna ukuthi kubelohulumende womanyano ngesiphangiphangi.
Ibandla leZapu elalikhokhelwa ngumuyi uJoshua Nkomo lacina lingena kumanyano lele Zanu kulandela ukubulawa kwabantu abanengi eNkabazwe leMatabeleland ababesekela ibandla leZapu.
Umgcinisihlalo webandla leMDC, uNkosazana Thabitha Khumalo, uthi kabathandabuzi ukuthi ibandla leZanu PF lifunani okwamanje njengoba umnotho welizwe usubhidlika.
Your browser doesn’t support HTML5
Ingxoxo Esiyenze LoNkosazana Thabitha Khumalo
Kodwa-ke uMnu. Joseph Tshuma, okudale leCentral Committee kubandla leZanu PF, uthi akulasinqumo esike sathathwa lidale leli esokuthi kumele kugongodwe abantu ukwenzela ukuthi kubelomanyano phakathi kwebandla leMDC lele Zanu PF.
Your browser doesn’t support HTML5
Ingxoxo Esiyenze LoMnu. Joseph Tshuma
Amabandla la athi kawafuni uhulumende womanyano lobanje kusaziwa ukuthi abanye abantu abakubandla leZanu PF lele MDC abafuna ukuthi kubunjwe uhulumende womanyano ukwenzela ukuthi kulungiswa konke okuhluphayo eZimbabwe.