Icele leMDC-T elikhokhelwa nguMnu. Nelson Chamisa lithi selixotshe uNkosazana Thokozani Khupe edale lephalamende kulandela ukwala kwakhe ukuthi asebenze loChamisa.
UMnu. Reuben Marumahoko, osabambe isikhundla sikasomlomo wedale lephalamende, uthe babhalelwe incwadi licele lika Chamisa libazisa ukuthi uMaKhupe sokumele amiswe ukuba lilunga ledale lephalamende emele ibandla leMDC-T.
UMarumahoko uthe sebezabikela ikhomishini yeZimbabwe Electoral Commission ngezifiso zebandla leli.
Isisekelo sombuso welizwe leZimbabwe sikubeka sobala ukuba ilunga ledale lephalamende lilakho ukusuka edale leli nxa ibandla lezombusazwe lingacela ukuthi likhitshwe.
Kodwa-ke uMaKhupe uthi umangaliswa ngosokwenziwa lidale lephalamande njengoba enguye owaqala ukubhalela idale leli elazisa ngokubangisanga kobukhokheli bebandla leMDC-T.
UChamisa loMaKhupe baqalisa ukulwela isikhundla sikamuyi uMorgan Tsvangirai engakabekwa amathuneni omdeni wakhe eBuhera esabelweni seManicaland.
UMaKhupe uqhubekela phambili esithi nguye okumele akhokhele ibandla leli nxa kulandelwa isisekelo seConstitution yeMDC-T. UMnu.Chamisa wakhethwa ngamadale eMDC-T abalisa ele National Council leNational Standing Committee.
Wengeze wathi umhlangano omkhulu oweCongress ozaqhutshwa mhlaka 21 kuyonale inyanga yiwo ozakhetha inkokheli yeMDC-T eqotho, kulandela ukubhubha kukaMnu. Morgan Tsvangirai owayekhokhela lelibandla.
Your browser doesn’t support HTML5
Ingxoxo LoNkosazana Thokozani Khupe