Amanani ethulwe nguhulumende aveza ukuthi imali esetshenziswa ngeleZimbabwe ukuthenga impahla ebalulekileyo egoqela ukudla phandle kwelizwe iqhubeka isedlula khatshana leyo etholwa lilizwe nxa lithengisa impahla zalo kwamanye amazwe, i-trade deficit.
Ugatsha lukahulumende olubona ngezamanani olweZimStat luveze ngoLwesithathu ukuthi ngoZibandlela eleZimbabwe lithengise izinto ezigoqela igolide, igwayi le-nickel, ama-exports, lathola amamiliyoni angamakhulu aphezu kwamahlanu, US$540 million.
Kodwa limali incane kakhulu nxa iqathaniswa laleyo esetshenziswe lilizwe ekuthengeni impahla egoqela umumbu, amafutha ezimota lazo izimota ngokwazo kanye lemitshina etshiyeneyo, ama-imports angena kuUS$692 million.
Lokhu kutshiye ilizwe lisesikhaleni lisilela ngemali edlula izigidi ezilikhulu, US$152 million, kubike inkundla yeNewz Wire.
Kodwa isikhala lesi sincane kulaleso ebesikhona ngoMpalakazi nyakenye ebesingena kuUS$266 million.
Ingcwethi zithi umahluko okhona phakathi kwemali esetshenziswa yiZimbabwe ukuthenga impahla phandle laleyo eyitholayo nxa ithengisa okwayo kwamanye amazwe kuveza sobala ukuthi umnotho awumanga kuhle.