Ikhomishini ebona ngezokhetho eyeZimbabwe Electoral Commision isinxuse intathelizindaba kanye labanye abafuna ukubona ukuqhutshwa kokhetho lokudingaamalunga edale lephalamende kanye labameli bezigaba mhlaka 26 Mbimbitho. I-ZEC inxuse abavela kweleZimbabwe kanye lakwamanye amazwe ndawonye lentathelizindaba ukuthi bazobhalosa kulungiselelwa lolukhetho.
Abekhomishini yeZEC bathi abafuna ukuzebona ngokhetho amaObservers kumele babone ukuthi kufika mhla zingamatshumi amabili lambili (22) kuMbimbitho lonyaka bebesebephiwe ingcwadi ezibapha imvumo yokukhangela ukhetho.
Umnumzana Dumisani Nkomo ingcwethi kwezombusazwe uchasisa ngokubaluleka kwentathelizindaba kanye labakhangeli bokhetho.
“AmaObserver abasibo malumga ama political parties. Ngabantu abakhangele ukubana uhlelo lonke lokukhetha lwenziwa njani. Bakhangela izinto ezinengi. Bakhangela umumo kungakabi lokhetho, Bakhangela ukuthi inhlanganiso zombusazwe zixhasa njani abantu kungakabi lokhetho. Baphinde bakhangele njalo langosuku lokhetho ukuthi bavota njani, bavota bekhululekile yini na, baphinde bahlolisise ukuthi nxa sekubalwa kubalwa kuhle na, lokuthi khnonokho okukhulunywayo yikho okwenziwe ngabantu ekhethweni.”
Umnumzana Effort Ncube enye ingcwethi kwezombusazwe uthi kuqakathekile ukuthi bonke abazohlolisisa bahlolisise kungela ndleko ngoba bemele abantu baZimbabwe.
"Ukuze ukhetho lube ngolukhululekileyo kumele intathelizindaba lalaba ababona ngokhetho bafinyelele kizozonke indawo mahala. Ungabona kubhadaliswa intathelizindaba kubhadaliswa lalaba abazobona ngokuthi ukhetho lukhululekile kutshukuthi iZEC ayizimiselanga ukuthi ukhetho lube ngolukhululekileyo. Intathelizindaba lalaba ababona ngezokhetho bathunywe ngabantu beZimbabwe. Ubabhadaliselani abantu beZimbabwe lalabo abangaphandle ngokuba bazosebenzela abantu beZimbabwe nxa bapha.”
Umnumzana Khulisani Dube ohlala koBulawayo uthi kubalulekile ukuthi uzulu wakweleZimbabwe azi ngokuqhutshwa kokhetho.
“Kuqakathekile ukuthi kube labakhuluma ngokwenzakala ndawo zonke elizweni. Lokhu kubhalisa kulakho ukuthi kuqale ukulandelelwa abantu bezenzela umsebenzi wabo. Kodwa okukhulu yikuthi uzulu mele azi okwenzakalayo ekhethweni kungelamgoqo.”
Unkosikazi Thabiso Nyoni intathelizindaba ukhuluma ngakukhangeleleyo lapho esephiwe imvumo yokukhangela ukhetho.
"Sikhangelele ukuthi sithole lawo maAccreditation but esikufunayo yikuthi nxa siObserver ama elections lawa singaze sahlukuyezwa njalo singacini sesibalwa ukuthi sibhale khonalokhu okuyikho okuyabe kusenzakala. Ngoba nxa sikhangela ama election adlulileyo, siyananzelela ukuthi amaJournalist acina sehlukunyezwa senyamalala izinto ezinjalo. Khathesi sicela ukuthi sivunyelwe ukwenza umsebenzi wethu ngendlela singaze savinjwa."
AbeZimbabwe Electoral Commision bona balomlandu wokuqhuba ukhetho lokusakaza oyabe enqobile kulolukhetho elizweni ikhiphe umbiko inxusa abafisa ukuzokhangela ukhetho. Kumbiko lo ithi izabhadalisa abafuna ukuhlolisisa lolukhetho.
Intathelizindaba ezibhalise lenhlanganiso yeZimbabwe Media Council zizabhadala amadola alitshumi akweleMelika ($10) ikanti ezivela kwamanye amazwe zibhadale amatshumi amahlanu ($50). Abazobona ngokhetho amaObservers, abavela emazweni ezwekazi laseAfrica bazabhadala amatshumi amabili amadola akweleMelika($20) ikanti abavela phandle kweAfrica babhadale ikhulu lamadola eMelika ($100). Ikanti abamele amanye amazwe elizweni bazabhadala amatshumi amahlanu amadola eMelika ($50).
Idale lomthethwandaba lizahlala ngoLwesithathu mhla zingamatshumi amabili lasithupha (26) kuZibandlela ukukhetha abazancintisa ezigabeni kusukela ngehola letshumi ekuseni kusiya ngehola lesine emva kwemini (10:00-16:00hr).
Lokhu kuzaqhutshelwa ezindaweni ezibekiweyo emthethweni kulandelwa isisekelo sokhetho.