Ibhanga elikhulu lomhlaba eleBank Bank lithi umnotho weZimbabwe ulakho ukukhula ngesilinganiso sokulitshumi ekhulwini, 10 percent ngomnyaka, eminyakeni elitshumi elandelayo nxa uhulumende engalandela izixwayiso njalo aguqule indlela aqhuba ngayo umsebenzi.
Kodwa lelibhanga lithi uhulumende engekela ukuguqula izenzo zakhe umnotho welizwe uzaqhubeka ubhidlika njalo ulahlekelwa yisilinganiso sokuthathu ekhulwini, 3 percent mnyaka ngomnyaka.
I-World Bank ithi ukuze umnotho uzinze, kumele uhulumende aguqule indlela aqhuba ngayo umsebenzi wokwemba amatshe aligugu, alungise imigwaqo ukuze ahuge izethekeli njalo aqinise inhlelo zokulima ukuze ilizwe limelane lokuguquka komkhathi osokudale indlala emangalisayo.
Sikhulumanje, inhlanganiso yeFood and Agriculture Organization (FAO) ithi abantu abalambayo abadinga ukuphathiswa ngokuhla okuphuthumayo ikakhulu emaphandleni bekhwele besuka ku2.7 million baya ku3.5 million.
I-World Bank ithi njalo eleZimbabwe yilo elilentengo yokudla edula kakhulu ukwedlula amazwe wonke aseAfrica, lisedlulwa kuphela ngeleArgentina emhlabeni wonke jikelele.
Ingcwethi ecubungula ezenotho uMnu Reggie Shoko uthi lanxa evumelana leWorld Bank kuzixwayiso zayo, kaboni kungaba liqiniso ukuthi umnotho weZimbabwe ungadlondlobala ngokulitshumi ekhulwini lanxa uhulumende engaze elandele inkuthazo yalelibhanga.
Your browser doesn’t support HTML5
Ingxoxo loMnu Reggie Shoko