Ikhansili yezomvikela kunhlanganiso yomanyano wamazwe omhlaba eye-United Nations Security Council ilakho ukuvota kusivumelwano sokuthi kumiswe impi ephakathi kwele Isreal leHamas ukuze kuphathiswe uzulu osesihlengeni seGaza.
Lokhu kwenzakala ngesikhathi umphathintambo wezomvikela eMelika uMnu Lloyd Austin esethekelela kwele Israel ukuyaxoxa ngokuvikelwa kukazulu kanye lokuthi i-Israel ifisa ukwenzani kusibanga esilandelayo ngalimpi.
Usizo luqhubekela phambili lungena esihlengeni seGaza, njalo ngeviki edluleyo i-Israel ivule omunye umngcele ukuze usizo lungene kodwa iUN ithi imota ezithwele usizo lolu ezedlula ikhulu (121) ezingene ngoMgqibelo ziyingcosana nxa ziqathaniswa lezingamakhulu amahlanu ezazingena losizo eGaza ngelanga limpi ingakaqali.
Umphathintambo weFrance obona ngokusebenzelana lamanye amazwe uNkosikazi Catherine Colonna uvakatshele i-Israel ngeSonto wakhuthaza ukuthi kumiswe impi okwesikhatshana ukuze kuphathiswe uzule weGaza njalo, njalo kukhululwe abathunjiweyo njengendlela yokusungula indlela yokumisa limpi.
Owake waba yinhloko yahulumende weBhilithane uMnu David Cameron losowabo weGermany uNkosikazi Annalena Baerbock, labo bakhuthaze ukuthi kuke kumiswe impi.
I-Israel yathi ifuna ukwehlula ibutho leHamas eGaza kulandela ukuhlasela kwebutho leli e-Israel mhlaka 7 ngoNcwabakazi, lapho elabulala abantu abedlula inkulungwane njalo lathumba abantu abangaba ngamakhulu amabili lane. Abedlula ikhulu balokhu bethunjiwe.
Uhlangothi lwezempilakahle eGaza olukhokhelwa yiHamas luth ukuhlasela kwe-Israeli sekubulalise abantu abafika phose inkulungwane ezingamatshumi amabili (18,700).
Exoxa leStudio7 uMnu Ambrose Sibindi owebandla leCCC njalo awayengumgcinisihlalo wenhlanganiso yabahlali eyeBulawayo Progressive Residents Association ukhuthaze amacele omabili ukuthi aqakathekise impilo kazulu.
Your browser doesn’t support HTML5
Ingxoxo loMnu Ambrose Sibindi.