Umabhalane weSadc, uMnu Tomaz Salomao ulubhekise eHarare ngolweSine ukuyakhuthaza amabandla akuhulumende womanyano ukuthi alungisise okuhluphayo phakathi kwawo ngokuphangisa.
UMnu Salomao ukhangelelwe ukukhulumisana labamela ibandla leZanu PF lamacele womabili eMDC kunkulumo, zona ezisaqhubeka.
Uhambo luka Salomao lolu lulandela olwequla elithunywe nguMongameli Jacob Zuma weSouth Africa ekuqaleni kwayonale iviki ngenjongo efanayo.
Inhloko kahulumende uMnu Morgan Tsvangirai, uveze ngolweSine ukuthi iqula likaZuma leli lizaphindela eZimbabwe njalo ngoMvulo. UTsvangirai uveze lokhu ekhuluma emhlanganweni weDiaspora Conference eCape Town.
Uthe njalo uhulumende uzakwazisa ngoMvulo amabizo amalunga amakomishini wonke akhethwe yikomidi yedale lephalamende kunyanga ezimbili ezedluleyo.
Abazi ngokwenzakalayo kunkulumo bathi kulokudonselana okukhulu phakathi kwebandla leZanu PF lecele leMDC elikhokhelwa nguTsvangirai, okwenze iSadc yathuma uSalomao eHarare.
Kodwa ingcwethi ecubungula ezombusazwe, uMnu Brilliant Mhlanga utshele uNtungamili Nkomo weStudio 7 ukuthi kaboni uSalomao ephumelela kuhambo lwakhe.