Inhlanganiso yomanyano wamazwe asemhlubulweni wangezansi yezwekazi leAfrica, eyeSADC, iqhube umhlangano enkundleni zokuxhumana ezebulenjini wokuhlaziya udubo lomkhuhlane wesihudo eseCholera osubhahile emazweni agoqela iMozambique, Tanzania, Zambia, leZimbabwe.
UMongameli Emmerson Mnangagwa ongene lumhlangano uthi kuqakathekile ukuthi amazwe aweSADC asebenzele ndawonye ekulwiseni lumkhuhlane.
“Laloba kulenhlelo eseziqhutshiwe, sikubona kuqakathekile ukuthi sithuthukise ukusebenzela ndawonye phakathi kwamazwe ethu, ikakhulu ngalesi sikhathi sikhangelane lobunzima bokuguquka komumo womkhathi, ukuswelakala kwamanzi, ukuthwalwa kwengcekeza kanye lokuhlanzeka.”
Welekelele ngokuthi iZimbabwe isiqinisa umsebenzi wokumelana lalumkhuhlane ukuze uphele elizweni okhokhelwa yikhomithi elenkokheli yengatsha zikahulumende ezitshiyeneyo.
“NjengeZimbabwe sathatha amanyathelo abalulekileyo aveza ukuthi sizalwisana njani leCholera. Amanyathelo la agoqela inhlangothi ezitshiyeneyo njalo alenhlelo zokuthuthukisa ukutholakala kwamanzi lokulahlwa kwengcekeza.”
Umgcinisihlalo wekhomithi yedale lepalamende ebona ngezempilakahle, uMnu Daniel Molokele uthe bazakhuthaza uhulumende ukuthi alandele izinqumo ezithethwe yilumhlangano.
Ukhansila ka ward 9 koBulawayo, uMnu Donaldson Mabutho uthe kulendingeko yokuthi uHulumende afake eceleni imali yokulwisana lomkhuhlane lo, kulandela isiqumo seSADC esokuthi kwengezwe imali zempilakahle emazweni akulumhlubulo.
Umhlangano lo ongenwe ngamazwe alitshumi lanhlanu agoqela iSouth Africa, Angola, Zambia, Namibia, Botswana lamanye, uphume lezinqumo ezimbalwa ezigoqela ukukhuthaza ukusebenzela ndawonye kwamazwe la, ukuthuthukiswa kwenhlelo zokuhlaba amajekiseni wokuzivikela awamaVaccinations, ukumisa ukumemetheka kweCholera ngokutholisa uzulu amanzi ahlanzekileyo lezinye.
Inhlanganiso ezithi iWorld Health Organisation, Africa Centre for Disease Control and Prevention, United Nations Children’s Fund (UNICEF) le World Food Programme (WFP) lazo zingene lumhlangano.
Uhlangothi lwezempilakahle izolo lubike ukuthi umkhuhlane lo ucatshangelwa ukuthi usubulele abantu abangamakhulu amane lamatshumi ayisitshiyagalo lunye (492) kusukisela ngesikhathi uqhamuka nyakenye.
Your browser doesn’t support HTML5
Udaba lweCholera esilwethulelwa nguTaboka Ncube.