Abakhokheli bamazwe akuSadc babuthene ngoMvulo kweleNamibia bekhulumisana ngokutshiyeneyo kulumkhono okugoqela udaba lweZimbabwe.
Imbiko esiyamukeleyo ikhomba ukuthi uMongameli Jacob Zuma weleSouth Africa, yena ongumlamulankunzi njalo eZimbabwe ubekhangelelwe ukwazisa umhlangano lo ngokuthi sengaphi ngomlandu wakhe wokulungisisa udaba lweZimbabwe.
Ugatsha olubona ngobudlelwano beSouth Africa lamanye amazwe lwazise ukuthi uZuma uzatshela umhlangano lo ukuthi uhulumende weZimbabwe usebenza kakuhle lanxa nje kusakhona okungakagcwalisiswa phansi kwesivumelwano seGlobal Political Agreement.
NgeSonto khona ugatsha lweSadc Troika luhluze udaba lweZimbabwe, lwahlaziya njalo udaba lwezombusazwe kwele Lesotho leSwaziland.
Abenhlanganiso ezizimeleyo labo bebethe gwaqa eWindhoek behlafuna okutshiyeneyo okuphathelane lezombusazwe emazweni akuSadc.
Inhlanganiso zeZimbabwe eziphatheke emhlanganweni lo, wona onikezwe ibizo lokuthi yiSadc People’s Summit, zedlula ezilitshumi.
Omunye wabaphetheke emhlanganweni lo emele inhlanganiso yeZimbabwe Coalition on Debt and Development uMnu Percy Mcijo uchasise okunengi ngezinqumo abaphume lazo, ikakhulu edabeni lweZimbabwe.