Icele leMDC elikhokhelwa nguMnu Morgan Tsvangirai selisole kakhulu amapholisa ngokuqhubeka ehlukuluza amalunga alo lokweba impahla yalo kulandela ukubotshwa kwabasekeli balelibandla eHarare lakoBulawayo.
NgoMgqibelo amapholisa akoBulawayo abophe abasakhulayo balelibandla abangamatshumi amahlanu njalo angena emahofisini alelibandla athatha ingwalo ezimumethe imfihlo yebandla lokunye.
Isehlakalo lesi silandele eseHarare ngeviki edluleyo lapho amapholisa angene khona esigodlweni seMDC abopha abasekeli bayo abathile.
Ababotshelwe koBulawayo baphange bakhululwa, kodwa abeHarare bamiswe emthethwandaba ngoMvulo besetheswa icala lokubangela udlakela njalo bazaphindela ngoLwesibili.
Umsekeli wesikhulumeli seMDC, uNkosazana Thabitha Khumalo uthi bayakusola kakhulu okwenziwa ngamapholisa.