I-Israel ithi izakhupha amanye amabutho ayo eGaza ukuze ayeqhuba izifundo njalo athole isikhathi sokuphumula ngesikhathi ilizwe leli lilungiselela ukuqinisa impi leHamas.
Impi le eyaqala ngenyanga kaMfumfu nyakenye ikhangelelwe ukuqhubekela phambili okwesikhathi eside njengoba i-Israel isithi ifuna ukubhidliza ibutho leHamas.
Kusikhathi esedluleyo I-Israel ibikhuthazwa yiMelika ukuthi ivikele abantu abangahlomanga njalo yehlise ukuhlasela kwayo eGaza.
Ibutho leHamas liphosele amabhomba eIsrael ngoMvulo, evelela esihlengeni seGaza.
Akukabi lemibiko yokuthi kulabafileyo kumbe abalimeleyo kulandela ukubhomba kweHamas lokhu.
Ekhuluma leStudio7 uMnu Nhlanhla Moses Ncube ingcwethi kwezombusazwe njalo engunobhala jikelele webandla leFreedom Alliance ukhuthaze amazwe alamandla ukuthi ahlalise phansi amacele amabili la ukuze kukhunyiswane umlotha.
I-Israel iqale ukuhlasela eGaza kulandela ukuhlasela kweHamas e-Israel okwabulalisa abantu abedlula inkulungwane (1 200) njalo kwathunjwa abangamakhulu amabili lamatshumi amane (240), kucatshangelwa ukuthi abalikhulu lamatshumi phose amathathu (129) balokhu besathunjiwe.
I-Israeli ithi kulamasotsha ayo afika phose amakhulu amabili (172) asefele kulimpi.
I-Hamas yafakwa kuluhlu lwamalwecatsha adlulisa amalawulo (ama-terrorist) yiMelika, United Kingdom, European Union lamanye amazwe.
IUnited Nations ithi isilinganiso sokungamatshumi ayisitshiyangalombili lanhlanu ekhulwini (85%) sabantu abahlala eGaza abafika phose 2.3 million selilahlekelwe yimizi.
Your browser doesn’t support HTML5
Ingxoxo loMnu Nhlanhla Moses Ncube.