Abenhlanganiso yeInternational Monetary Fund bathi lanxa umumo kwezomnotho eZimbabwe ungemuhle, lisesekhona ithuba lokuthi ilizwe lilingusise okune kokumqoka okuzaphathisa ukutshutshisa inhlelo zokuletha inguquko kwezomnotho kanye lokudinga indlela ezisekela ukuqedwa kokubhadalwa kwezikwelede elokhe zisesekhona.
Emhlanganweni lentathelizindaba ngoLwesine, ekupheleni komhlangano oqoqwe ngabe IMF eZimbabwe, besebenzelana lohulumende, wokubonisana phezu kwesimo somnotho ezwekazi le Africa- IMF Regional Economic Outlook For Sub-Saharan Africa, umqondisi kuhlangothi olubona ngentuthuko yenotho, unkosikazi Antoinetta Sayeh, uthi kumqoka ukuba leli lizwe lalo lithuthukise uhlangothi lokwakha. Uthi u Sayeh lanxa izwekazi leAfrica libhekane lodubo lomkhuhlane weEbola umumo kwezenotho ususiba ngcono kwamanye amazwe, kodwa kweleZimbabwe umumo lokhe ungayindawo.
Wengeze ethi kuqakathekile ukuba luqedwe ngesiphangiphangi udubo lwe Ebola oseluhlasele amanye amazwe eAfrica ngoba seluphazamisa izwekazi lonke njengoba abakwamanye amazwe belikhangela njengelizwe elilodwa.
Umsekeli kasibalukhulu webhanga elikhulu lelizwe ele Reserve Bank uDr Khuphukile Mlambo, obesemhlanganweni munye utshele intathelizindaba ukuthi inhloso bekuyikubonisana lokuhlaziya phezu kwezifundo ilizwe elingazilandela kwamanye amazwe okubalisa angomakhelwane, kunhlelo zokuthuthukisa umnotho welizwe.
Uthi u Dr Mlambo,udubo lwe Ebola seluhlupha laseZimbabwe ngoba abakwamanye amazwe bebona lizwekazi le Africa njengelizwe linye, osekuphazamisa kundaba zokuthuthukisa umnotho welizwe njengoba abalezimali zokuzasungula amabhizimusi kuleli lakwamanye amazwe akilo,besesaba ukuza kuleli lanxa ubufakazi buveza ukuba luhlasele ngamandla emazweni amathathu abalisa ele Liberia, Siera Leon le Gunea okwamanje.Uthi kunengi okungenziwa ngeleZimbabwe ukuthuthukisa umnotho welizwe nxa ilizwe lenkokheli zikahulumende bengazinikela ukukwenze lokho.
Abenhlanganiso ye International Monetary Fund bathi bakhangelele ukuba, kusiyafika isikhathi esabekwayo, eleZimbabwe, lizilandela ngokugcweleyo izithembiso elazenza kulenhlanganiso phansi kohlelo lweStaff Monitoring Program, lokuvuselela umnotho, lilakho ukuphumelela.
Lokhu kubalisa ekwethulwa kweReport kuqula labaphthintambo eleCabinet, ngabogatsha lwezemali lentuthuko kwezomnotho besitsho ukuba nguquko bani esithe yaba khona esigabeni sezokwemba amatshe aligugu kusiyafika inyanga kaNhlangula ngomnyaka ozayo.
Izokwethulwa njalo edale lephalamende inguquko ezakwenziwa kumthetho we Banking Act kusiyafika inyanga kaNhlangula ngomnyaka ka 2015 kanye lokuba akukhiphe egwalweni lwakhe lwe Government Gazette uhulumende echasisa inhlelo zokunikeza amandla kumankampani kuzizalwane zakuleli – Indiginisation and Economic Empowerment Policies.