Umthethwandaba we high court eHarare ngoLwesihlanu uvimbe inyathelo elaselithathwa yisiphathamandla sikahulumende uMnu. Tafadzwa Muguti, elokumisa ukusebenza inhlanganiso ezizimeleyo ezingabhalisanga ehofisini yakhe kulesosigaba.
Ukuhlaziya loludaba, sixoxa loMnu. Mfundo Mlilo, umqondisi wenhlanganiso elwela ilungelo loluntu eye Citizen Solidarity Network.
Your browser doesn’t support HTML5
Ingxoxo loMnu. Mfundo Mlilo
Kusenjalo, umthethwandaba weMutare namuhla udlulisele phambili kuviki ezayo ukuthethwa kwamacala etheswa uMnu. Hatirarami Momberume abalisa elokudlwengula lelokubulala, kulandela ukubhubha kuka Memory Machaya, owayeleleminyaka elitshumi lanhlanu obikwa wayengunkosikazi wakhe.
Igqwetha elimmelayo, uMnu. Brian Mahamanda utshele iStudio 7 ukuthi uphakathi kwemizamo yokuthi icala leli lidluliselwe komunye umthethwandaba ngoba oweMutare umadolonzima kuloludaba.
UMnu. Momberume, owenkonzo ye Johane Marange Apostolic udinga imvumo yokukhululwa ngemali yesibambiso eye bail.
Kolunye njalo udaba, umthethwandaba we high court koBulawayo ulokhe ukhangelelwe ukunquma kudaba lokuthi wenqabele ababalisi ukukhalala umsebenzi, olwaphanyekwa kulelidale ngumfundi oleminyaka eyisitshiyagalolunye, esithi ukulwisana phakathi kukahulumende lamatitshala kuphazamisa izifundo zabantwana esikolo.