Inhlanganiso yamazwe akuzwekazi le-Europe eye-European Union isiyengeze isikhathi sezijeziso zenotho ezafakelwa amankampani ezomvikela eZimbabwe okuthiwa azisetshenziswa ukwephula ilungelo loluntu.
Izijeziso lezi zizaqhubekela phambili kuze kufike mhlaka 20 Nhlolanja 2025. Lokhu kuza ngesikhathi uhulumende kaMongameli Emmerson Mnangagwa kuthiwa wehluleka ukuqhuba ukhetho olukhululekileyo nyakenye njalo lokhu esephula ilungelo loluntu.
UMnangagwa wathi ehluthuna amandla ngomnyaka ka2017 wethembisa ukulungisisa ubudlelwano lamazwe angentshonalanga agoqela imelika lakunhlanganiso ye-European Union.
UMnu. George Charamba, isikhulumeli sikaMnangagwa exoxa leStudio7 kusikhatshana esedluleyo wathi nxa eleMelika lamanye amazwe entshonalanga kawafuni ukudlelana leZimbabwe ngakho-ke bazadinga abanye abangane abokudlelana labo. Lokhu kwakhulunywa njalo yisikhulumeli sebandla leZanu-PF, uMnu. Chris Mutsvangwa.
Umphathintambo obona ngokudlelana lamanye amazwe uMnu. Frederick Shava utshele iStudio7 ukuthi ubengekho emsebenzini ngoLwesibili ngakho-ke kenelisi ukukhuluma ngodaba lolu.
Ukuhlaziya loludaba sixoxe lomnu Nhlanhla Moses Ncube olandela ezombusazwe njalo ongunobhala jikelele weFreedom Alliance.
SEE ALSO:
Ingxoxo loMnu Nhlanhla Moses Ncube.wav