Umanyano weEuropean Union uthi uzimisele ukucwayisisa izijeziso zenotho owazifakela uMongameli Mugabe lamanye amalunga eZanu PF.
UMongameli weEU Council uMnu Herman Van Rompuy wethule amazwi la ngoLwesibili ngemva kokuhlangana loMongameli Jacob Zuma weleSouth Africa eBrussels. UZuma ubecele iEU ukuthi yesule izijeziso lezi, esithi zenqabela ingqubelaphambili eZimbabwe.
Ekhuluma edale leEuropean Union Parliament ngoLwesithathu, uZuma ugcizelele inkuthazo yakhe esithi izijeziso lezi kumele zesulwe.
Isikhulumeli seZanu PF uMnu Rugare Gumbo utshele iStudio 7 ukuthi bayayamukela imizamo enziwa nguZuma kanye lomqondo weEuropean Union wokucwayisisa izijeziso lezi.
Ukuhlaziya loludaba uNtungamili Nkomo oweStudio 7 uxhume ingcwethi ecubungula ezombusazwe uMnu Brilliant Mhlanga yena othi izijeziso kumele zesulwe.