Umanyano weEuropean Union wazise ngoLwesihlanu ukuthi suyesule amagama amalunga eZanu PF angamatshumi amahlanu lanye (51), lamankampani angamatshumi amabili (20) kuluhlu lwawo lwezijeziso zenotho.
Kodwa umanyano lo uthi iziphathamandla zalelibandla ezedlula ikhulu, njalo zigoqela uMongameli Mugabe zizaqhubeka zetheswe lezizijeziso andubana kuqhutshwe ukhetho olukhulekileyo lezombusazwe zilungiswe.
Umphathintambo obona ngezemithetho uMnu Patrick Chinamasa lomphathintambo obona ngobudlelwano beZimbabwe lamanye amazwe uMnu Simbarashe Mubengegwi sebevunyelwa ukuba baphiwe amaviza okwethekelele emazweni eEU lanxa belokhu bephansi kwalezi zijeziso.
Ummeli weEU eZimbabwe uMnu Aldo Dell' Ariccia utshele intathelizindaba ukuthi ababili laba sebezavunyelwa ukungena eEurope ngoba bekuqula likahulumende wenkazatho elinikezwe umlandu wokukhulumisana lenkokheli yeEU phezu kwezijeziso.
Abasuswe kuluhlu lwezijeziso bagoqela intathelizindaba zomsakazo weZimbabwe Broadcasting Corporation ezithi uReuben Barwe, Happison Muchechetere, Judith Makwanya lentatheli zamaphephandaba alawulwa nguhulumende ezithi uPikirai Deketeke, Caesar Zvayi loMunyaradzi Huni.
Ezinye zeziphathamandla zeZanu PF ngezithi uMnu Sikhanyiso Ndlovu, July Moyo lesikhulumeli salelibandla uMnu Rugare Gumbo. Kodwa uGumbo uthe inyathelo leli alitsjo lutho kubo, esithi abakufunayo yikuthi izijeziso zesulwe zonke.
Ingcwethi ecubungula ezombusazwe uMnu Nkululeko Sibanda usole kakhulu inyathelo leEU esithi umanyano lo awumelanga uyekethise ngoba uMongameli Mugabe lebandla lakhe beqhubeka ngokwephula amalungelo oluntu.