Umanyano wamazwe eEurope, owe European Union sunqume ukuthi izijeziso owazethulela iziphathamandla zeZanu PF lamankampani alobudlelwano lebandla leli ziqhubeke zikhona.
I EU ithethe isinqumo lesi ngoMvulo ngaphambilini komhlangano wayo omkhulu oqale eBrussels kwele Belgium ngolweSibili. Umanyano lo uthi izijeziso lezi, ezethulwe ngomnyaka ka 2002, zizaqhubeka zikhona ngoba amabandla akuhulumende engakagcwalisisi isivumelwano seGlobal Political Agreement.
Lanxa iEU iqhelise izijeziso lezi, yesule amankampani ayithoba munwe munye kuluhlu lwezijeziso. Amankampani la agoqela iZiscosteel, iScotfin lamanye. I EU yesule njalo amabizo abayisithupha ababekuZanu PF lanxa nje bonke sebafa ngaphandle kukaMnu Dumiso Dabengwa osowahlubuka kubandla leli.
Abesuliweyo kuluhlu lolu bagoqela omuyi uMnu Joseph Msika, uMnu Vitalis Zvinavashe, labanye. Isiphathamandla seZanu PF, uMnu Joram Gumbo utshele iStudio 7 ukuthi ibandla lakhe kalithokozi ngenyathelo le EU leli, esithi bafuna izijeziso zesulwe ngokugcweleyo, okungamazwi ethulwe njalo ngumsekeli wesikhulumeli seMDC ekhokhelwa nguMnu Arthur Mutambara uMnu Renson Gasela.
UNkosazana Thabitha Khumalo owecele leMDC elikhokhelwa nguMnu Morgan Tsvangirai yena uthi ibandla lakhe litshayela iEU ihlombe ngokwesula amankampani athoba munwe munye kuluhlu lwezijeziso, esithi nxa abeZanu PF befuna izijeziso zesulwe ngokugcweleyo kumele bahloniphe ilungelo loluntu njalo bagcwalise isivumelwano seGPA.
Ingcwethi ecubungula ezombusazwe uMnu George Mkhwanazi utshele uNtungamili Nkomo weStudio 7 ukuthi iEU yenze kuhle ngokungasusi izijeziso kuziphathamandla zeZanu PF. UMkhwanazi uthi ukuze izijeziso zesulwe, kumele uMongameli Mugabe labanye bakhe bahloniphe intando kazulu.