Inhlanganiso ye European Union ithi izahlanga ngenyanga ezayo ukuze ihlaziye udaba lwezijeziso zenotho ezafakelwa umongameli Robert Mugabe labanye bakhe ezibavimba ukwethekelela lamazwe.
I EU ithi ifuna amabandla akuhulumende womanyano ahloniphe isivumelwano seGlobal Political Agreement andubana esule lezi zijeziso. Udaba lwezijeziso zenotho ngolunye olulokhe luhlupha kuhulumende womanyano, abeZANU PF besithi i MDC kumele ibone ukuthi izijeziso lezi ziyesulwa.
Kunjalo nje isigodlo someli wakwele France eZimbabwe silandule umbiko wokuthi osetshiya isikhundla sokuba ngumeli walelolizwe eZimbabwe uMnumzana Laurent Contini ukhuthaze amazwe aku EU ukuthi esule izijeziso zenotho ngesikhathi evalelisana lomsekeli kamongameli uNkosikazi Joyce Mujuru.
Osaphethe isikhundla someli weFrance eZimbabwe uMnumzana Deitmar Petrausch uthi ilizwe leFrance lizathatha isinqumo ngodaba lwama sanctions limanyene lamanye amazwe akunhlanganiso ye EU ngoNhlolanja.
Ingcwethi ecubungula ezombusazwe uMnumzana Samukele Hadebe utshele uBrenda Moyo weStudio 7 ukuthi amazwe aphetsheya alakho ukusuthiseka ngobufakazi be SADC ukuthi uhulumende womanyano uqhubeka kuhle, amazwe le acine esesula lezizijeziso.
