Inhlanganiso elwela ilungelo loluntu emhlabeni jikelele eyeHuman Rights Watch ithi umanyano we European Union akumelanga wesule izijeziso ezafakelwa umongameli Robert Mugabe labanye bakhe kubandla leZANU PF, kuze kulungisiswe okuhluphayo kuhulumende womanyano, kugcwaliswe isivumelwano seGobal Political Agreement.
Inkuthazo yeHuman Rights Watch le ilandela ukugcizelela kwebandla leZANU PF ukuthi aliseyukuqhubeka ngenkulumo zokulungisisa okusele kulenga kuhulumende womanyano, kuze kwesulwe izijeziso ezetheswa uMugabe labanye bakhe.
Izijeziso lezi zivimba uMugabe labanye bakhe ukwethekelela amazwe aku European Union, eleMelika lamanye. Kodwa ibandla leZANU PF lihlezi lisithi lezizijeziso lezi zetheswa ilizwe leZimbabwe yikho uzulu ebhekane lobunzima.
I Human Rights Watch ithi ukwesulwa kwezijeziso kungabangela ukwephulwa kwelungelo loluntu okuphindwe kabili.
UMnumzana Walter Nsununguli Mbongolwane yingcwethi ecubungula ezombusazwe. UMbongolwane utshele uBrenda Moyo weStudio 7 ukuthi amazwe angentshonalanga alakho ukwesula lezizijeziso nxa ibandla leZANU PF lingahlonipha umthetho lelungelo loluntu.
