Abenhlanganiso elwela amalungelo amakholwa esiKristu, eyeZimbabwe Christian Alliance baqhube ucwaningo mayelana lokuhlatshwa kwabantu ezweni ijekiseni evikela iCovid-19 eye Vaccine oluveze ukuba abantu bahlehlela emuva kuloluhlelo ngezizatho ezehlukeneyo.
Abesifazana abanengi ezigabeni zeMaNdebeleni abendele kubobaba abasebenzela phandle kwelizwe kubonakale ukuba balakho ukuthelelwa lula igcikwane leli ngoba lapho omkabo bephenduka ekhaya bevela emazweni angomakhelwane, bangena ngendlela ezingekho emthethweni njalo bengaholwanga iCovid-19.
Inengi labantu ezweni abakahlatshwa ijekiseni kodwa ucwaningo oluqhutshwe yiZimbabwe Christian Alliance selubonise ukuba abantu balembono ehlukeneyo ngalelijekiseni leCovid 19 Vaccine.
UNkosikazi Lynette Dube oqhube loluphenyo uthi babone ukwehlukana kwenkolo lokungabi lolwazi olweneleyo ngale ijekiseni.
"Safica ukuthi 10.7 bayafisa ukuhlatshwa, 75.1 bathi hatshi, 14.2 abalaqiniso ukuthi bengafuna yini ukuhlatshwa kumbe hatshi. Abathi hatshi balezizatho ezimbalwa abalalwazi lejekiseni lenkolo yabo ayivumi ukuthi bahlatshwe abanye bathi abaqiniso ukuthi ingahambelana laboingacina ibadalela eminye imikhuhlane."
Uqhubeke eveza ukuba inengi labesifazane abalabomkabo abasebenzela phandle kwelizwe basengozini yokubamba iCovid-19.
"Inhlelo yevaccination ibamba omama, esigabeni seMatabeleland obaba bayasuka besiyasebenzela eSA kumbe Bostwana uma bephenduka bangena ezweni endaweni ezingekho emthethweni okulakho ukubangela ukuba abesifazana babambe lolubhubhano."
Ucwaningo lolu luqhutshwe kusetshenziswa inkundla yebulenjini iWhatsapp, impumela yaveza ukuba abantu abalalwazi njalo abafisi ukuhlatshwa ijekiseni le. Kuvele njalo ukuba imfundiso yezinye inkolo ayivumelani lokuhllatshwa, abanye njalo besesabela ukuba bengabamba eminye imikhuhlane ngemva kokuhlatshwa.
Kusenjalo, amakhosikazi asuka endaweni ezehlukeneyo ezweni athe gwaqa edolobheni leMutare behlaziya inhlupho ezehlukeneyo ababhekane lazo ngesikhathi ilizwe liphakathi kweziqondiso zeCovid-19 lockdown kusukela nyakenye NgoMbimbitho.
UNkosikazi Paxidia Mauto ongene lumhlangano osuka eBinga uthi zinengi inhlupho abavele bebhekane lazo esezengezwe yikuqhamuka kwalolu bhubhane.
"EBinga silobunzima bamanzi ngoba sasuswa kuZambezi sayahlaliswa ezintabeni ukuthola amanzi kunzima sihamba imango emide sihlangana leNdlovu lezilwane kubanzima kithi lalapho isilwane singangena esibayeni obaba bayabe bengekho kuhkanganisa lobunzima bokuhelekezela abantwana esikolo ukuze bengahlangani lezinyamazana zendle."
Esinye njalo isakhamizi seBinga esingene lumhlangano uNkosikazi Irene Mumpande uvumelane loNkosikazi Mauto.
"Thina eBinga sisebunzimeni, sasuswa kuZambezi River sasiwa entabeni saswela indawo zokulima sabuyela emfuleni ukuthi silimele imuli kodwa emfuleni laphana kulemvubu lengwenya kuZambezi ngesikhathi lapho silima imvubu ziyadla izilimo zethu kuthi ingwenya ziyaphuma emanzini ziyeluma abantu yikho lihlala lisizwa kuthiwa eBinga abantu babulawa zingwenya kakhulu."
UMhlangano lo uqoqwe ngabenhlanganiso elwela amalungelo abesifazana, iJust Association okuvele khona njalo ukuba ngaphandle kwenhlupho eziqanjwe yizakhamizi zeBinga, ubudlwangudlwangu, ukuhlukuluzwa kwezocansi, ukungafinyeleli lula uncedo lwezempilakahle lokuhlukumezeka kwabantwana ngezinye zezinhlupho ezivezwe ngabesifazana baseZimbabwe.
Umhlangano wase Mutare ungenwe ngabesifazana abadabuka eZimbabwe lasemazweni angomakhelwane agoqela iBotswana, South Africa, Malawi, Zambia lamanye, oqhutshwe kugqitshwa linyanga kaMbimbitho yokunanza lokuqakathekisa umsebenzi omuhle owenziwa ngabesifazane emhlabeni jikelele, eye International Women’s Month.
Your browser doesn’t support HTML5
Udaba lwenhlupho ezibhekane labesifazana ngenxa yeCovid 19 siluphiwa nguAnnahstacia Ndlovu