Inhlanganiso yabalimi abamhlophe eyeCommercial Farmers Union ngoMvulo icele njalo uhulumende womanyano ukuthi emise ukuthunjwa kwamapulazi okubikwa kuqhubeka endaweni ezitshiyeneyo zelizwe.
I CFU ithi uhlelo lolu lubuyisela muva imizamo yokuvuselela ezokulima. Ithi njalo uhulumende kumele angenele kumiswe udlakela kanye lobudlova bonke obenziwa yilabo abathumba amapulazi lawa abagoqela amasotsha, abasekeli beZanu PF leziphathamandla zaleli bandla.
Inhlanganiso le ithi ilizwe lizathola isivuno samathani angaba yinxenye yesigidi kuphela lonyaka, khona kudingakala phose izigidi ezimbili. Umkhokheli weCFU uMnu Deon Theron, ekhuluma leStudio 7 usole uhulumende ngokwehluleka ukumisa udlakela emapulazini.
Omunye wabaphathintambo ababona ngendaba zaphakathi kwelizwe uMnu Giles Mutsekwa uthe ugatsha lwakhe lalo lukhathazekile kakhulu ngokwenzakalayo amapulazini.
Ingcwethi ecubungula ezombusazwe uMnumzana Qhubani Moyo utshele uNtungamili Nkomo weStudio 7 ukuthi uhlelo lolu kumele lumiswe abalimi bayekelwe balime batholise ilizwe ukudla okwaneleyo.
Kunjalo nje iCFU ibika ukuthi amalunga ayo amabili abotshwe ngoLwesine akhululwe ngumthethwandaba weMutare ngoMvulo ngemva kokuhlawuliswa imali yesibambiso, eyebail.
Ababili laba, abathi uMnu Trevor Gifford loMnu Dawie Joubert bazabuyela emthethwandaba mhlaka 16 kuyonale inyanga.