Ingcwethi enhlangothini ezitshiyeneyo zempilo zamukele ngenjabulo isinqumo esithethwe nguhulumende sokuthi abantu kumele bagqoke impahla yokuzivikela, enjengama mask nxa bephuma ezindlini, ngalesi sikhathi eleZimbabwe selingene esibangeni sesibili sohlelo lokulwisana lokuthelelanwa komkhuhlane weCoronavirus.
Omunye walezi ngcwethi ngusomabhizimusi, olilunga njalo lenhlanganiso ye I AM 4 Bulawayo Fighting COVID-19, uMnumzana Nkosana Mazibisa. UMazibisa uveze ukuba lokhu kuzanceda ukuthi uzulu abekwazi ukuzivikela kulumkhuhlane.
Nkosana Mazibisa
“Siyabonga uhulumende ngoku emphasiza ukuthi abantu bagqoke ama mask. Ama mask kasonto eku fashion, yinto eyokuthi abantu bazivikele, babekwazi ukubana bengathelelane lelo gcikwane,” kutsho uMazibisa.
Ekhuluma ngomsebenzi abakwenzayo koBulawayo, njengenhlanganiso, uMazibisa uthe balenhlelo ezijonge ukufundisa uzulu koBulawayo okunengi okuphathelane lomkhuhlane weCoronavirus, njalo bakhangelele ukubumba isikhwama semali ezasetshenziswa ukusiza abaswelayo lokuthuthukisa izibhedlela zakoBulawayo.
“Isifiso sethu yikuthi sifinyelele izindlu ezifika 10 000 koBulawayo, not abantu, izindlu, ngoba sikhangela per household. So far we are at 625, ngoba izandla zethu zimfitshane,” kutsho uMazibisa.
Abafisa ukuthola ulwazi oluthile mayelana ngenhlanganiso ye I AM 4 Bulawayo Fighting Covid 19, lilakho ukuluthola enkundleni yokuxhumana eyebulenjini eyeTwitter, phansi kwesihloko esithi @iam4byo.
Your browser doesn’t support HTML5
Ingxoxo Esiyenze Lo Nkosana Mazibisa