Umthethwandaba weGauteng High Court eSouth Africa ngoLwesithathu unikeze inhlanganiso yeAfriforum imvumo yokuthi idonsele uhulumende weZimbabwe emthethwandaba ngodaba lokuthunjwa kwamapulazi ababalimi abamhlophe.
Inhlanganiso le ithe izacela njalo umthethwandaba ngenyanga ezayo ukuthi ubambe iZimbabwe ngamandla ukuthi inanze isinqumo seSadc Tribunal esethulwe ngo2008 esokuthi uhulumende amise uhlelo lokuthatha amapulazi abamhlophe njalo ehlawule labo asebathathelwa amapulazi.
Igqwetha leAfriforum uMnu Willies Spies uthi inhlanganiso yakhe ijabule kakhulu ngesinqumo somthethwandaba, esithi bazanikeza uhulumende weZimbabwe amaphepha ngodaba lwamapulazi kunsukwana ezizayo.
Kodwa ingcwethi ehlaziya ezombusazwe uMnu Briliant Mhlanga utshele uNtungamili Nkomo weStudio 7 ukuthi kabona uhulumende weZimbabwe esila lendaba lenyathelo elithathwa yiAfriforum.