Abasakhulayo abazelwe belegcikwane elibangela umkhuhlane wengculaza eleHIV bathi bayekela ukunatha amaphilisi awokulwisana laleligcikwane, amaARVs ngenxa yokuthi abazali babo ababatsheli iqiniso ukuthi ngawani baze babekwazi sebevuleke ingqondo.
Lokhu kuvezwe emcimbini obuseNkulumane koBulawayo ngoMgqibelo obubizwa ngokuthi Miss Dreams Innovation Challenge owokuzibukisa owe-modelling. Umhlangano lo ubuqoqwe yiVictory Siyanqoba imanyane leNational AIDS Council, lezinye inhlanganiso ezizimeleyo.
Osakhulayo okhethe ukuzibiza ngokuthi ngu Dumisani Dube uthi abazali bathi banatha amaphilisi ekhanda nsukuzonke kuthi nxa sebesiba kwazi besebetshiya amaphilisi la bahlaselwe yimikhuhlane eminengi.
UNkosikazi Esther Zitha oweVictory Siyanqoba uthi umcimbi lo bawezenzela ukuthi bakhuthaze abasakhulayo ikakhulu amankazana ukuthi azivikele kugcikwane leHIV.
Osebenza lenhlanganiso ezimeleyo eyeAfracaid uMnumzana Nhlanhla France Dube uthi bakhuthaza abasakhulayo ukuthi banathe kuhle amaphilisi, behlolwe njalo bazivikele nxa besiya emacansini.
UMnumnzana Arthur Ndlovu owe NAC emhlubulweni weYoung Peoples Network of Sexual and Reproductive Health uthi injongo yabo yikuthi kwehliswe inani labantu abaphila legcikwane leHIV.
Omunye wamankazana obephatheke kulumkhosi uNkosazana Ntando Khumalo uthi ufunde ukuthi azivikele njani emkhuhlaneni.
Emcimbino lo abatsha bebenikezwa ithuba lokuthi bayezihlola igcikwane le HIV.
Your browser doesn’t support HTML5
UBathabile Masuku Uyalandisa