Idale leHigh Court selinike uMnu. Sengezo Tshabangu, okwelinye icele lebandla leCitizens Coalition for Change, ukuba avimbe wonke amalunga ebandla leli awaxotshisa edale lephalamende ukuthi bengancintisi kukhetho lwama by-elections oluzaqhutshwa ngoMgqibelo.
Amagqwetha kaTshabangu athi isinqumo lesi kasivimbeki edale leSupreme Court lobanje icele leCCC elikhokhelwa nguMnu. Nelson Chamisa lisithi lizakuye emthethwandaba lo okuzakwenza abaxotshiswa nguTshabangu bengene kukhetho lolu.
Ekhuluma kumhlangano eHarare lentathelizindaba namuhla, igqwetha lika Tshabangu, uMnu. Nqobani Sithole, uchaze ngokuphawulwe lidale leHigh Court lokunye.
"Inkundla kaJudge lamhlanje isiphe izinqumo ezimbili zokuthi ababexotshiwe bangaphindi futhi bangene kukhetho olumele lubekhona Ngomqgibelo lokuthi uInterim Secretary General uMnu Sengezo Tshabangu ake ame ukuxotsha amalunga edale lephalamende lamkhansila okugoqela nje wonke owayevotelwe kukhetho olusanda kwedlula.
Umsekeli wesikhulumeli sebandla leCCC, uMnu. Gift Ostallos Siziva, uthi bazakuyamelana lesinqumo seHigh Court eSupreme Court njalo bayaphatheka kukhetho.
Nqobani Sithole
"lmpumela zedale aiyazamukela eyokumisa ukukhutshwa kwabavotelwayo lokuthi abaxotshwayo babgabgeni kukhetho lokhu sizakuya edale leHigh Court ukuyamelana lakho njalo amalungiselelo okhetho eTshabalala lakwezinye indawo asefike esibangeni esiphezulu sikhuthaza uzulu ukuya kukhetho."
Elinye lamagqwetha kaTshabangu, uMnu. Lewis Uriri, uthi okwethulwe ngumthethwandaba weHigh Court akusoze kumiswe yikuphanyeka udaba lolu eSupreme Court. Uthi labo asebevinjwe ngumthethwandaba oweHigh Court kabavunyelwa ukungena kukhetho oluzaqhutshwa ngempelaviki. Kodwa uNkosazana Fadzayi Mahere, owayeyisikhulumeli sebandla leCCC njalo omele iMt. Pleasant edale lephalamede, uthi okwethulwe yiHigh Court kuzabekwa eceleni ibandla lakhe lingaphanyeka udaba lolu eSupreme Court.
lsiphathamandla sezokhetho kukomishini ebona ngezokhetho eyeZimbabwe Electoral Commission, uMnu. Utloile Silayigwana, uthi sebekubonile okwethulwe lidale leHigh Court.
"Sesiyamukele okuphaqulwe yinkundla yeHigh Court lamhlanje yokumisa abathile abakade benelise ukungena kukhetho olukhona NgoMqgibelo njenge ZEC sizalandela okuphaqulwe lidale."
Kulabanye abasola uChamisa abathi wayengazi akwenzayo ngokuba lebandla elingelasisekelo sombuso ngesikhathi kungenwa kukhetho olwaqhutshwa ngoNcwabakazi. Bathi lokhu yikho okwenza uTshabangu wangena emthanjeni webandla leli wenza umathanda.
Okwamanje bathi uTshabangu kukhanya enguye osezibambe esidukwini kubandla leCCC elilakho ukubhidlika ngokuya kwesikhathi. Abasekela uChamisa bathi lizavuka lithi khwatshu ibandla leli njalo uChamisa uyakwazi akwenzayo.