Izisebenzi zikamanisipala we Gwanda ebezikhalele umsebenzi ngoLwesithathu zikhalaza iholo lazo elenyanga ezinhlanu ezedluleyo zibuyele ngoLwesine ntambama emsebenzini ngemva kokungenela kukahulumende kuloludaba, yena othi kufanele zilobe ugwalo oluchasisa izizatho zokuba kungani kufanele bekhalale umsebenzi, olwe “Show Cause Order.”
Izisebenzi zithi zifuna iholo lazo elenyanga ezinhlanu elingazibhadalwanga njalo ziyala ukuthi iholo lazo lehliswe ngoba umanisipala esithi liphezulu kakhulu.
Izisebenzi lezi zake zakhalala umsebenzi ngenyanga kaMabasa ekuqaliseni komnyaka kodwa zabuyela sezithenjiswe ukuthi udaba lolu luzalungisiswa. Zithi ikhansili ilokhu ingakagcwalisi izithembiso zayo zokuthi zihole ngesikhathi esifaneleyo ngenyanga zonke.
UMnu. Sipho Ndlovu, umgcinisihlalo wogatsha lweGwanda kunhlanganiso elwela amalungelo ezisebenzi zikamansisipala eye Zimbabwe Urban Council Union utshele uSithandekile Mhlanga weStudio 7 ukuthi izisebenzi zizahluza loludaba lomqhatshi wazo kanye lohulumende ngoMvulo ozayo.
Your browser doesn’t support HTML5
Ingxoxo LoMnu. Sipho Ndlovu
Umanisipala weGwanda ubikwa esithi bekungadingeki ukuthi izisebenzi zikhalala umsebenzi ngoba ubesevele eseqalisile ukuziholisa.