EleMelika lithi uhulumende weZimbabwe kumele aguqule imithetho yokhetho ukuze ukhetho oluzayo luqhutshwe ngendlela ekhululekileyo.
Lithi iZimbabwe Electoral Commission (ZEC) kumele ibe lugatsha oluzimeleyo olulawula ukhetho kungela kungenela kwabezombusazwe.
Izixwayiso lezi zethulwe yisigodlo seMelika eZimbabwe kumkhankaso esiwuqhuba enkundleni zokuxhumana.
Isigodlo lesi sithi njalo uhulumende kumele avumele amabandla aphikisayo akhulume kumaphephandaba afana leHerald kanye lemisakazo yeZBC.
Sengeze sathi uhulumende kaMongameli Emmerson Mnangagwa kumele atshiyane njalo lokuncitsha abasekeli bamabandla aphikisayo ukudla.
EleZimbabwe lizaqhuba ukhetho lwamaby-elections okugcwalisa izikhala ephalamende lakumakhansili mhlaka 26 ngoMbimbitho libuye lenze njalo ukhetho lwelizwe lonke ngomnyaka ozayo.
Umsekeli wesikhulumeli seMDC Alliance uMnu Felix Magalela Mafa Sibanda utshele iStudio 7 ukuthi bayavumelana lamazwi eMelika.
Your browser doesn’t support HTML5
Ingxoxo loMnu Felix Magalela Mafa Sibanda
Kodwa ilunga leZanu PF uMnu Joseph Tshuma uwasolile lawamazwi esithi uhulumende weMelika kumele itshiyane lokungenela kundaba zeZimbabwe.
Your browser doesn’t support HTML5
Ingxoxo loMnu Joseph Tshuma