Umongameli webandla leZAPU uMnu. Dumiso Dabengwa uthi abantu ababulawa kumbuqazwe weGukurahundi kumele bangcwatshwe kutsha ngenhlonipho kusukela ngoNcwabakazi kusiya kuMfumfu ngomnyaka ozayo. Kodwa inengi lithi akufanelanga kudilizwe ubufakazi kungakathonisiswa abaphatheka kulokhu.
Ekhuluma enkonzweni yesikhumbuzo sabantu ababulawa kumbuqazwe eyenziwe ngelanga lokuthakazelela ukubunjwa komanyano phakathi kweZAPU leZANU PF ebiseStanely Hall, uMnu. Dabengwa uthe kufanele abantu beqale ukukhangela indawo lapho okwalahlelwa khona abantu ukuze amathambo abo, abuthwe angcwatshwe kutsha. Uthe umhlubulo weMatabeleland usulengcitshi ezizahlola amathambo lawa.
Umongameli webandla leANSA uMoses Mzila Ndlovu uthi umqondo lo muhle kodwa kumele kuqale kukhulunyiswane lezihlobo zalabo ababhubhayo njalo kube lophenyo ukuze kungadilizwa ubufakazi.
UMnumzana Felix Mafu, owenhlanganiso ye Post Independence Survivors Trust uthi kumele kungadilizwa ubufakazi njalo ababulali baqale bathothinisiswe amacala abo.
Umqondisi weBhetshu likazulu, umnumzana Mbuso Fuzwayo uvemelana lombono kaMnu. Mzila, loMnu. Mafu.
Owalahlekelwa nguyise ngalesosikhathi uNkosikazi Similo Gwebu uthi, uyajabula nxa kusiba lethuba lokuhlonipha ababhubhayo ngoba balahlwa njengenyamazana. Uthi isifiso sakhe yikuthi kuthonisiswe udaba lweGukurahundi njalo ababulali baxolise kuzulu weMatabeleland.
Kubikwa kwabulawa abantu abazinkulungwane ezingamatshumi amabili – 20,000 – eMatabeleland leNkabazwe kusukela ngomnyaka ka1983 kusiyafika umnyaka ka1987 ngesehlakalo seGukurahundi.
UMugabe wathi leso “kwakuyisikhathi sokuhlanya” kukahulumende wakhe kodwa kazange axolise ngaloludaba.
Your browser doesn’t support HTML5
UBathabile Masuku Uyalandisa