Ibandla leZanu PF lithi ukwethulwe nguGeneral Constantino Chiwenga ngoMvulo kwephula isisekelo sombuso welizwe njalo kuyafana lokuthi ubefuna ukususa uMongameli Robert Mugabe lohulumende embusweni.
Isikhulumeli sebandla leZanu PF, uMnu. Simon Khaya Moyo, uthi uChiwenga ubengakhulumeli bonke abakhokheli bebutho lamasotsha ngakho-ke wenze okungekho emthethweni.
Utshele umsakazo weVOA Studio 7 ukuthi uChiwenga kaziphathanga njengomuntu owayengomunye ababekhokhela ivuye leZANLA ngesikhathi sempi yenkululeko.
Uthi usengcolise igama lakhe ngokwethula umbiko othethise uhulumende kaMugabe owakhethwa nguzulu.
UMoyo uthi, “Umbiko wakho ubujonge ukwenza ukuba kuqhamuke udlakela elizweni. Umbiko wakhe ubungela gama lakhe ubuveza ukuba yena umele bonke abakubutho kodwa-ke akumanga njalo. Lokhu akwenzileyo yikuzama ukususa uhulumende esikhundleni okungekho emthethweni okulicala elikhulu okumangalisayo. Ngakho-ke ubefuna ukuthu kube lokuxabana elizweni kumiswe lokusetshenziswa kwesisekelo sombuso welizwe.”
Uphinde wathi “yikho okwenzakala nxa ibutho lifuna ukungenela kwezombusazwe.”
UChiwenga utshele intathelizindaba ngoMvulo ukuthi ibutho kalisoze ligoqe izandla lekele ububi bonke obenzakala eZimbabwe okufana lokuxotshwa komsekeli kamongameli, uMnu. Emmerson Mnangagwa, labanye bakhe.
Uthi ilizwe selibhidlizwe ngokwenzakala elizweni elibuswa nguhulumende kaMugabe.