Uhulumende ubikwa esethethe amanyathelo okujezisa izikolo ezingamatshumi amabili lantathu, 23, ezetheswa icala lokuxotsha abafundi abehluleke ukubhadala imali ye-school fees izolo kanye lalezo ezibhadalisa abantwana ngedola lakweleMelika kuphela.
Lokhu kubikwe liphephandaba leNewsDay, lona elithi izikolo lezi zigoqela eseKudzanai Primary, Kuwadzana 6 Primary, Allan Wilson High , Chinhoyi 2 High, Mhanyame Primary, Chirorodziva, Tafara Primary, Helwyn Primary, Biri Primary, Glenview 2 High, Chiri Government leHatcliffe High.
Ugatsha lwezemfundo lwethule umbiko ngoLwesibili luxwayisa abaphathi bezikolo ukuthi bengaze baxotsha abafundi abayabe behluleke ukubhadala i-fees kumbe ukubhadalisa ngedola laseMelika ngoba lokho kuyikwephula umthetho.
Kusenjalo, isikhulumeli samapholisa uMnu Paul Nyathi wethule umbiko exwayisa izikolo ukuthi zigcine imali emabhanga, hatshi emahofisini azo ngoba sezisanda izehlakalo zezigebenga ezihlasela ezikolo zihlomile zintshontsha imali.
Izigebengu lezi zintshontshe imali engena kunkulungwane phose ezingamatshumi amabili, US$ 17,000 eGeorge Solundika High School koBulawayo njalo ngoLwesibili zihlasele eLomagundi zatshontsha imali engakaziwa ukuthi ibiyimalini.
Amabhizimusi amanengi asezigcinela imali ngoba engawathembi amabhanga eZimbabwe ngemva kokuguqulwa komthethwa owadala ukuthi abantu balahlekelwe yizimali zabo emabhanga kuminyaka esanda kwedlula.
Ingcwethi kwezenotho njalo esebenza lenhlanganiso yeCoalition for Market and Liberal Solutions uMnu Rejoice Ngwenya utshele iStudio 7 ukuthi ngempela imali kumele igcinwe emabhanga, kodwa uthe kunzima ngoba amabhanga kathembakalanga.
Your browser doesn’t support HTML5
Ingxoxo loMnu Rejoice Ngwenya