Inkokheli yelinye lamabandla aphikisayo ele Free Zimbabwe Congress, ithi inkinga eseZimbabwe kwezombusazwe yikuba inengi yababumba amabandla ezombusazwe, benza lokho ngoba befuna izikhundla kuphela, hatshi ukusebenzela uzulu. Inengi lazo libikwa limotsha isikhathi lidinga indlela zokususa umongameli Robert Mugabe esikhundleni, zingela nhlelo ezibalulekileyo zokuba bazakwenzani ngemva kwalokho.
Lokhu ngokunye kokuvezwe zinkokheli, zelinye lamabandla aphikisayo ele Free Zimbabwe Congress, elibunjwe ngomnyaka ka 1999. Leli bandla lithi kungenxa yalesi sizatho lamabandla esehlulekile ukuzithatha intambo zombuso ngoba elenjongo inye ekhangela ngamehlo amafitshane angacabangi ukuthi kuyokwenziwani ngemva kokukhitshwa kukaMugabe.
Umgcinisihlalo wohlangothi lwabasakhulayo kulelibandla le Free Zimbabwe Congress, umnumzana James Katso uthi eyabo injongo yehlukile kweyamanye amabandla aphikisayo. Wathi kungakho bephatheke enhlelweni zokufundisa uzulu ukuba leli libandla elizimisele ukunakekela abantu.
UKatso yena uthi ungomunye wabayisikhombisa, abancintisa bemele lelibandla kukhetho lwamalunga edale lephalamende, kukhetho luka 2013. Ethi kunje basabalele ilizwe lonke abalandeli balo lanxa engasabethanga inani labo njalo lokuba bande kuziphi izigaba.
Umnumzana Absalom Shumba, uyisakhamuzi seHarare esitshengise ukungalazisisi lelibandla, ethi lalokho elikukhulumayo kungekutsha, kuyinkulumo asebeyijwayele yena labanye bakhe.
U Shumba uthi okudingwa nguzulu weZimbabwe yinguquko empilweni hatshi usizo okwesikhathi esincane nje, njengalokho okutshiwo yilelibandla eliveze ukuba liphathisa uzulu ngendlela ezehlukeneyo.
Leli bandla lithi kunje selisungule inhlelo ezithize zokuvuselela leli bandla ukuze lazakale empakathini, kube yilo elizakwanelisa ukuletha inguquko uzulu ayilangathelelayo ngoba isimo elizweni sesidinga abantu abafuna ukusebenzela uzulu hatshi ukubanga izikhundla njengalokho okwenzakalayo okwamanje, emabandleni amanengi aphikisayo abunjwe eminyakeni le edluleyo, kusukela ilizwe lithola uzibuse.
Ukuthi lizaphumelela kulokhu na, abanengi bathi bazoyicela isivuthiwe ngoba wonke amabandla nxa esungulwa ahlabela ngoma inye yokuthi wona ehlukile kulamanye.