Umnyaka esisanda wusungula uthembisa ukuba lukhuni kakhulu kuzulu weZimbabwe kwezombusazwe kunye lezomnotho welizwe.
Abakhangelela ukuthi kube lombuso owehlukeneyo basalomnyaka lenyanga ezimbalwa kuze kwenziwe ukhetho.
Ukuhlaziya loludaba sixoxe lesiphathamandla sebandla leZanu PF, uMnu. Joseph Tshuma endawonye lengcwethi kwezombusazwe, uMnu. Dinizulu Macaphulana onguye osungula lingxoxo.
"Nxa ngiwubhekile lumnyaka njengesakhamuzi uyangesabisa kakhulu ukuthi kuyini okuzenzakala ngemva kokubona ukuthi uhulumende wehlulekile ukubhadala izisebenzi ezisebenzileyo," kutsho uMacaphulana.
Uthi okukhanya sobula yikuthi njengoba ilizwe likhanya lizabhekana lendlala ngenxa yokutshisa kwelanga lokuswelakala kwezulu uhulumende uzehluleka ukuphathisa uzulu oyabe esendlaleni ngoba kuzahlangana ukwehluleka kombuso lomkhathi ongamanga kahle.
Wengezele esithi lo umnyaka uzakuba mubi kakhulu ikakhulu kulabo abalabantwana.
UTshuma uthi okumele sikwenze okwakuqala yikubonga unkulunkulu ngokusenelisa ukungena emnyakeni omutsha ngoba bebanengi abehluleka ukuwubona bona belesifiso.
"Kodwa thina esesithe sathola inhlanhla lomusa sangena emnyakeni lo ngumnyaka esimele sivule amehlo, sivule ingqondo sibambane sisebenze ndawonye sonke," kutsho uTshuma.
UMacaphulana uvumelane loTshuma kodwa wengezelela esithi: "Kodwa khonoko ukubambana lokuphana imiqondo kumele kuqale phezulu."
Your browser doesn’t support HTML5
Ingxoxo loMnu. Dinizulu Macaphulana loMnu. Joseph Tshuma