Uhulumende ukhuthaza uzulu ukuba aqakathekise umkhuba wokwethekelela indawo ezithakazalelwa ngabavela kwamanye amazwe elizweni njengendlela yokusekela imisebenzi yentuthuko lokuba azi ngomumo wendawo zokuzilibazisa eZimbabwe.
Umphathintambo wezokwethekelelwa kwelizwe umanjinela Walter Muzembi uthi uhulumende seveze isinqumo sedale le cabinet sokuba ukuya endaweni ezivame ukwethekelelwa ngabakwamanye amazwe eze Zimbabwe yizizalwane zakuleli kuthuthukisa ilizwe ethi u gatsha lwakhe soluveze indlela ezenza ukuba izisebenzi zika hulumende zenelise ukwethekelela ilizwe zisebenzisa izimota ze CMED ezitshona zingela msebenzi eziwenzayo kunye lokusebenzisa izindlu ezitholakala kuma lodge atshiyeneyo asendaweni ezigcinelwa izinyamazana zendle kuleli:
Uthi ugatsha lwakhe solutenga izimota ezizagcinelwa ezabelweni ezitshiyeneyo zelizwe ezilakho ukuphathisa njalo kulimisebenzi ethi injongo yikuba isisebenzi sikahulumende kunye lemhuli yaso senelise ukuthola ithuba lokuphumula lokwethekela kanje kanye ngomnyaka.
Kodwa incitshi kwezezisebenzi ongu co-ordinator kunhlanganiso ye Zimbabwe Congress of Trade Unions ZCTU umnumzana Elijah Mutemeri uthi lokhu yikuhuga izisebenzi nje ngoba indlela uhulumende azibhadala ngayo zingenelisi ukuba zihlabe ikhefu kanje:
Uthi okwamanje uhulumende uyehluleka ukubhadala izisebenzi ngamalanga acacileyo ehlala ewaguqula santando ngakwelinye icele inengi labantu kuleli lingelayo misebenzi ezwayo.U Mutemeri uthi okudingakalayo yikuba uhulumende avule ama fekitali kunye lokuwasekela ngokuzwayo ukuze abantu abanengi bethole imisebenzi kuqala anduba bathole imali yokuyazithokozisa lokuhlaba ikhefu:
Uthi ngaphandle kwezisebenzi zikahulumende kutholakala lezinye izisebenzi ezifana lezisebenzela ama bhizimusi ayinxenye kahulumende ama parastatals zisebunzimeni obukhulu ezinye ezifana lezisebenzela uloliwe esezilenyanga ezilitshumi lane zingaholi.
U Mutemeri uthi lokhu sokungena lakumabhizimusi azimeleyo asekhetha lawo ukubhadala izisebenzi santando ngoba imisebenzi isilela.
Ele Zimbabwe libhekana lodubo lokusilela kwemisebenzi osolufika kusilinganiso sokungamatshumi athobamunwe munye ekhulwini-90% ngesikhathi amafekitali kunye lamabhizimusi azimeleyo equbekela phambili evala kanti lezisebenzi zitholiswa iholo eliphansi.