Izitolo ezinkulu ezigoqela esePick n’ Pay leseOk sezithengisa ezinye izinto ezibalulekileyo empilweni kazulu ngedola leMelika kuphela ngoba zisithi imali yeZimbabwe ayiselahlonzi futhi ibulala amabhizimusi azo.
Izinto lezi zigoqela amafutha okupheka, isepa yokuwatsha, uchago kanye lokudla okulungiswa yinkampani yeDelta. Umzekeliso: i-2 liters yamafutha okupheka ibiza US$4.59.
Isiphathamandla senhlanganiso emela izitolo eyeZimbabwe Retailers Association uMnu Denford Mutashu utshele lumsakazo ukuthi bathethe lelinyathelo ngoba impahla lezi baziwoda ngedola leMelika.
Ngokunjalo, uthi ukuqhubeka bezithengisa ngedola lakuleli kutshayelela phansi amabhizimusi abo. Inyathelo labezitolo leli liza ngesikhathi idolo leZimbabwe liqhubeka lisiwa nxa liqathaniswa leleMelika.
Emkambo wensitha idola leMelika elilodwa lithengwa ngenkulungwane zamadola eZimbabwe angamakhulu amane, 40,000, kusiya phezulu, okuyisilinganiso esisetshenziswa ngamabhizimusi lanxa uhulumende esithi kumele asebenzise isilinganiso se-1:32,000.
Isiphathamandla senhlanganiso emela abathengi eyeNational Consumer Rights Association uMnu Effie Dlela Ncube, othi ukuthengiswa kwempahla ngedola leMelika kuphela lokhu kuzalimaza abantu abavele besadalala njalo behlaselwe yindlala embi lonyaka.
Your browser doesn’t support HTML5
Ingxoxo loMnu Effie Dlela Ncube
Lanxa sehlulekile ukuxhumana leziphathamandla zikahulumende ngaloludaba, uhulumende uthi ukuhlela intengo ngedola leMelika kuphela kulicala.