Umkhokheli kahulumende wakwele Ethiopia, uMnu. Abiy Ahmed Ali, namuhla uphiwe isicoco sokukhuthaza ukuthula emhlabeni eseNobel Peace Prize.
Esamukela isicoco lesi edolobheni leOslo kwele Norway, uAli ukhuthaze ukuthi kubelokuthula emhlabeni esithi impi zomvukela zibulalisa abantu abanengi, zidiliza lezakhiwo njalo zibisele emuva intuthuko emazweni.
Uthe wamukela isicoco lesi ngoba usebenza kahle lomkhokheli wakwele Eritrea ukuthi kulungiswe udaba lomngcele olwenza kwaqhamuka impi phakathi kwamazwe la ngomnyaka ka1998 kubangwa idolobho leBadme.
“Ngiyabonga kakhulu ukuthi liwunanzelele umsebenzi wami wokuthi kubelobudlelwano phakathi kwelizwe leEthiopia lele Eritrea kulandela ukubangisana umngcele. Ngamukele isicoco lesi engithi ngesabantu bakwele Ethiopia lomunye wami wakwele Eretrea esisebenze gadalala ukuthi kulungiswe udaba lomngcele oluhluphayo.
“Ngiyasamukela isicoco lesi njalo ngimele abantu bonke bezwekazi leAfrica lomhlaba wonke jikelele ababhekane lempi ezingapheliyo.”
UAli uthe kuyajabulisa ukuthi sokulokuthula phakathi kwamazwe la.
Isicoco lesi siphiwa umuntu okhuthaza ukuthula.
“Namuhla ngime phambi kwenu ngilikhumbuza ukuthi ngake ngaba lisotsha elalwa impi yomvukela phakathi kwele Ethiopia lele Eretrea. Ngaba lisotsha ngisesengumfanyana. Ngabona ububi bempi ngisilwa egangeni.
“Bakhona abangazi lutho ngempi abayincomayo bengazi ukuthi kayilunganga. Kabazake babone ukwethuka kwabantu njalo lokudina kwayo.”
Kubikwa ukuthi abantu abanengi bafa kwathi abanye basuku emngceleni wamazwe la bebalekela impi. Kukhanya engani abacele womabili lokhu ejamelene loba sokungela kuxokozela okunengi eBadme.
Owayengumongameli wakwele South Africa, umuyi uNelson Mandela wake wasithola isicoco lesi.
Your browser doesn’t support HTML5
Okwethulwe Ngumkhokheli Wakwele Ethiopia