UMongameli Robert Mugabe ufikise iminyaka yokuzalwa engamatshumi ayithoba minwemibili lathoba minwemibili-88, ngoLwesibili esithi uzimisele ukuqhubeka esembusweni lanxa bekhona abathi sokumele atshiye umsebenzi ngoba seluphele.
Kungxoxo ayenze lomsakazo weZBC, uMugabe uthe ingamanga imbiko yokuthi impilakahle yakhe ayimanga kuhle. Uthe uziphilele njalo uqine okumangalisayo. Uthakazelele lelilanga lemmuli yakhe.
Abasekeli bebandla lakhe bazakuba lomkhosi omkhulu eMutare ngoMgqibelo. UMugabe uthe okunye okwenza impilakahle yakhe ihlale ikahle yikuthi nsuku zonke uvuka eselula lokuqinisa umzimba wakhe okwehola elilodwa.
Kulembiko ethi ulomkhuhlane wemvukuzane ehlasela abesilisa, iprostate cancer. Kodwa uMugabe uyakulandula lokhu.
Esipha inkuthazo kwabatsha ukuthi baphile okweminyaka eminengi, uthe akumelanga banathe kakhulu, kanti lokubhema igwayi kumele batshiyane lakho. Wengeze wathi abantu kumele baziphathe ukuze kwenqatshelwe umkhuhlane wengculaza.
Isikhulumeli seZanu PF uMnu Rugare Gumbo uthi bamtshayela ihlombe uMugabe. Umqondisi weNational Youth Development Trust uMnu Liberty Bhebhe uthe uMugabe sokumele atshiye umsebenzi.