UMongameli Emmerson Mnangagwa okwele Belarus ngoLwesine wenze imihlangano embalwa loMongameli Alexander Lukashenko.
UMnangagwa, osanda kuvela kwele Russia njalo okhangelelwe ukuya kwele Azerbaijan lele Kazakhstan kanye lakwele Switzerland, ulobelane izivumelwano ezimbalwa loMongameli Lukashenko ezigoqela ukuncediswa kwezokulima ngele Belarus.
Uthi imihlangano lenkokheli yamazwe la ilakho ukuletha inguquko kwezomnotho eZimbabwe lapho abantu abahlupheka khona ngenxa yokugugudeka komnotho.
Banengi abantu abachothoza inhambo zikaMnangagwa abathi kazisoze zincede ilizwe leZimbabwe.
Kulabanye njalo abathi inhambo lezi zizaguqula umnotho weZimbabwe ngoba uMnangagwa uphanda imali yokuvuselela umnotho.
UMnangagwa utshele uMongameli Lukashenko ukuthi umnotho weZimbabwe ubhidlizwa yizijeziso zenotho ezafakelwa inkokheli yebandla leZanu PF ngamazwe entshonalanga.
“Ilizwe leZimbabwe libhekane lezijeziso zenotho ezisinda okumangalisayo ezenza ukuthi ilizwe lingadlelani lamanye amazwe ngemfanelo. Imali yethu yagugudeka yazwe yalahlwa ngenxa yezijeziso lezi ezafakwa ngamazwe entshonalanga.”
Your browser doesn’t support HTML5
UMnangagwa Uthi Izijeziso Zenotho Zibhidliza iZimbabwe
Ingcwethi kwezenotho, uMnu. Masimba Kuchera, uthi uMnangagwa uchitha isikhathi kwele Belarus lamanye amazwe la angathuthuki ngemfanelo.
Your browser doesn’t support HTML5
Ingxoxo Esiyenze LoMnu. Masimba Kuchera
UMnangagwa wake wethekelela eleChina lapho alobelana khona izivumelwano ezinengi loMongameli Xi Jinping.
Abantu bathi izivumelwano lezi kazizange ziguqule umnotho welizwe leZimbabwe.