UMongameli Emmerson Mnangagwa uthi selimemetheka okwethusayo igciwane leCOVID-19 eZimbabwe ngakho-ke kumele abantu bonke balandele iziqondiso zokuvimba umkhuhlane lo ezethulwa yinhlanganiso yeWorld Health Organization lohlangothi lwezempilakahle.
UMnangagwa wethule lokhu kungcwatshwa uMorton Malianga loNkosikazi Ellen Gwaradzimba emathuneni amaqhawe elizwe eNational Heroes Acre.
Lokhu kwenzakala ngesikhathi kusanda kubhubha iziphathamandla zikahulumende ezimbili – uGwaradzimba obengumphathintambo wesabelo seManicaland loSibusiso Moyo obephethe uhlangothi olubona ngokudlelana lamanye amazwe.
UMnangagwa ukhuthaze uzulu ukuba abambane lohulumende ekulwiseni lumkhuhlane.
“Inkululeko yethu yalethwa ngabanengi besenza okwehlukeneyo. Akulamhlobo ongathiwa wenza okukhulu empini. Sakwenza lokhu singabantu ababambeneyo. Ngokunjalo impi le esiyilwa leCOVID-19 singayinqoba njengabantu ababambeneyo.”
Uqhubeke ethi abantu okumele baye emsebenzini eqakathekileyo yibo bodwa abavunyelwa ukubonakala behamba hamba.
“Ngikhuthaza uzulu ukuba aqhubeke egeza ezandla, lokugqoka ama mask kuhle,kumele singaminyezelani. Lesi ayisiso sikhathi sokudinwa, labo abangekho emsebenzini kabahlale ngekhaya”
Lokhu kusekelwe yisiphathamandla sebandla eliphikisayo ele MDC-T, uMnu Witness Dube.
“Umbhuqazwe weCOVID-19 usubuye ngamandla kusigaba sesibili. Usulolaka, ezinye inhlamvu zawo sezibulala abantu ngamandla. Abantu kabangadingi inhambo okungamelanga bazihambe ngoba bayabe besiba lamathupha okuba lomkhuhlane lo.”
Your browser doesn’t support HTML5
UMnangagwa Ukhala Ngokumemetheka Kwegciwane leCOVID-19
Kodwa isikhulumeli seMDC Alliance, uMnu Felix Magalela Mafa, uthe uMnangagwa kumele kube nguye lebandla lakhe abaqala ukulandela iziqondiso ze lockdown.
“Into ekhona yikuthi upresident weZANU PF labantu beZANU PF bayakhuluma kodwa ukwenza kabenzi. Silezindawo ekade kulo Mnangagwa eMasvingo, bayakhuluma nsuku zonke nge COVID-19 ukuthi abantu balandela izinqondiso zeWHO kodwa bona kabakulandeli.”
UGwaradzimba ubhubhele kwesinye isibhedlela eHarare ngemva kokukhulelwa ngumkhuhlane weCOVID-19. UMalianga kubikwa ukuthi ugule okwesikhathi eside.