UMongameli Emmerson Mnangagwa, obekwele Russia lapho ahlangane khona loMongameli Vladmir Putin, ngoLwesithathu ukwele Belarus okwamanje lapho adinga usizo lokuvuselela umnotho welizwe leZimbabwe obhidlika okumangalisayo.
UMnangagwa uthe kuzwisa usizi okwenzakala eZimbabwe ngesikhathi edinga uncedo lokuvuselela umnotho welizwe emazweni abalisa eleRussia, Belarus, Kazakhstan lamanye.
Uthe akulunganga ukuthi abantu abatshengisele emigwaqweni ngoMvulo layizolo badilize izakhiwo njalo batshontshe emavinkilini abosomabhizimusi. Ugcizelele esithi kumele kube lokuthula elizweni.
UMongameli Emmerson Mnangagwa uxoxa loMongameli Vladmir Putin
UMnangagwa ubike ebulenjini bokuzilibazisa obeFacebook kukhasi lakhe ukuthi eleRussia lilobelane lele Zimbabwe izivumelwano ezimbalwa ezijonje ukuthuthukisa ilizwe leZimbabwe.
Banengi abantu abachothoza uhambo lwakhe kubekhona njalo abamsekelayo.
Omunye wabasekela uhambo lolu nguMnu. Joseph Tshuma, ilunga lebandla leZanu PF.
Kodwa uNkosazana Thabitha Khumalo webandla leMDC elikhokhelwa nguMnu. Nelson Chamisa, uthi uMnangagwa udlalisa imali kazulu ngokuya emazweni la.
Lokhu kusekelwe nguMnu. Rejoice Ngwenya, ingcwethi kwezenotho ezimele yodwa.
UMnangagwa wethekelela kwele China nyakenye lapho alobelana khona izivumelwano ezimbalwa leziphathamandla zelizwe leChina. Kodwa uzulu uthi izivumelwano lezi kazizange zincede ilizwe leZimbabwe.
Your browser doesn’t support HTML5
Uhambo Luka Mnangagwa Luzanceda Na Ilizwe leZimbabwe Eselibhidlika?