UMnu. Emmerson Mnangagwa, okhiphe uMnu. Robert Mugabe esihlalweni encediswa libutho, uthi uzasebenza ngamandla akhe wonke ukwenzela ukuthi kuvuselelwe umnotho welizwe leZimbabwe njalo kudlelwane lamanye amazwe.
UMnangagwa, ongowesibili ukuthi abambe isikhundla sikamongameli selokhe sangenwa nguMugabe ngomnyaka ka1987, wethule lokho enkundleni yeNational Sports Stadium ngoLwesihlanu esanda kugcotshwa ukuba ngumongameli.
Amabutho atshengisa umongameli omutsha inhlonipho ...
Uthe abantu beZimbabwe kumele babambisane ukwenzela ukuvuselela konke okuhluphayo elizweni laye uzazama ukuthi akhulumisane njalo asebenzelane labantu bonke elizweni langaphandle kwelizwe.
“Ngiyafisa njalo kumele ngikwenze ukuthi ngisebenzele izizalwane zonke zeZimbabwe kungelabandlululo. Kangisoze ngikhethe umhlobo, ezokholo kanye lokuthi abantu bakumabandla waphi."
Uphinde wakubeka sobala ukuthi abamhlophe abathathelwa amapulazi bazanikwa imali lobanje kusobala ukuthi umhlabathi wabo ungeke wabiselwa kubo ngoba lokhu kuyabe sokufana lokuthengisa abalwa impi yenkululeko.
Abanye abantu ababone uMongameli Emmerson Mnangagwa ethatha isikhundla sikaRobert Mugabe.
Uthe kumele abantu babambisane ukwenzela ukuthi kuvuselelwe umnotho welizwe elibhekane lodubo lokuswelakala kwemisebenzi.
“Loba nje ngikhuluma lapha ngilokhe ngikhuluma ngebandla lami leZanu PF, ngiyakwazi ukuthi abantu bonke labakumabandla atshiyeneyo kanye lemihlobo etshiyeneyo bakhangelele ukuthi ngibamele okumangalisayo. Ngizakwenza lokhu ngoba iwofisi yami ivele ikhangelane lakho lokhu.
Uphinde wathi uhlonipha kakhulu owayengumongameli uMnu. Mugabe okumele anikwe inhlonipho efaneleyo ngokuphatheka empini yenkululeko.
Kabe bebanengi abantu ababone kugcotshwa uMnu. Emmerson Mnangagwa eNational Sports Stadium ngoLwesihlanu.
“… Wasilwela sonke empini yenkululeko ngakho-ke lami nginje ngiyamhlonipha. Kimi ngimenza ubaba, umcebisi njalo omunye wami.”
Uthe sokumele abantu bakhohlwe ngokwenzakale eZimbabwe esikhathini esedluleyo. “Asikhohlweni ngokunengi okonakala eZimbabwe. Asikhangeleni sonke esingakwenza ukwenzela ukuthi sithuthukise ilizwe lethu. Ilizwe leli lingeke laphumelela nxa sikhangele okwenzakala kudala. Okumele sikukhangele yilapho esiyakhona. Asibambisaneni sakhe ilizwe lethu. Ngiyalicela lonke okuthi lisebenzele ukuthuthukisa ilizwe lethu. Akumelanga sibuyele esimeni esikesabakuso.”
UMnu. Emmerson Mnangagwa ugcotshwa ukuba ngumongameli nguChief Justice Luke Malaba.
Ukubeke sobala njalo ukuthi kuzakwenziwa ukhetho oluqakathekileyo ngomnyaka ozayo njengalokho obekuhlelwe yikhomishini yeZimbabwe Electoral Commission.
UMugabe ubekhangelwe ukuthi uzancintisa kukhetho lolu eseleminyaka yokuzalwa engamatshumi ayisitshiyagalolunye lane (94). Okwamanje ibandla le Zanu PF lithi lizamelwa kukhetho lokudinga umongameli nguMnangagwa.