Osephuma esikhundleni sikaMongameli weMelika uMnu Joe Biden wethule amazwi akhe okuvalelisa izolo kusihlwa wasola kakhulu ukungenela kwabantu abanothileyo kwezombusazwe zeMelika esithi kuyingozi ephazamisa umbuso okhululekileyo.
UBiden uzakwehla embusweni esededela uMongameli omutsha uMnu Donald Trump ngoMvulo.
Lanxa engababethanga ngamagama abantu laba, uMongameli Biden ukhanya ubekhuluma ngezinothi ezifana losomabhizimusi onothe ukwedlula umuntu wonke emhlabeni jikelele uMnu Elon Musk, yena osekele uTrump ngezigidi zemali emkhankasweni wokhetho lwanyakenye, lapho anqobe khona uNkosikazi Kamala Harris.
“Kuyingozi ukufaka amandla ezandleni zabantu abalutshwana abanothileyo. Nxa bengafakelwanga imigoqo, balakho ukuphatha umbuso butshapha,” kutsho uBiden.
“Ngikhuluma-nje, luyagxila udubo lwezinothi esezilamandla kwezombusazwe eMelika. Lokhu kuphazamisa umbuso okhululekileyo kanye lamalungelo ethu.”
UMongameli Biden uchothoze njalo amankampani enkundla zokuxhumana afana leFacebook ngokumisa inhlelo zokuvimba imbiko yamanga ethulwa enkundleni lezi esithi iqiniso kumele liqakathekiswe ngaso sonke isikhathi ukuze kuvikelwe uzulu.
Uthe, “Ukwethulwa kwezindaba ngokukhululekileyo kuyatshabalala. Abahleli bayanyamalala. Inkundla zokuxhumana aziselandaba lokuqaba amanga. Iqiniso selivalwa ngamanga ngenxa yokufuna amandla lenzuzo.”
UBiden ukhulume njalo ngenhlelo zentuthuko athi ziqhutshwe nguhulumende wakhe ngemva kokungena embusweni ngo2021.
Inhlelo lezi zigoqela ukwakha izakhiwo ezintsha, ukuvuselela umnotho, ukuqeda umkhuhlane weCovid-19 kanye lokulwisana lokuguquka komkhathi.
Kumbiko owehlukileyo izolo njalo uBiden wazise ukuthi eleIsrael labeqembu leHamas sebevumelene ukubeka izikhali phansi eGaza lokukhulula izibotshwa kanye lalabo abathunjiweyo, esithi uhulumende wakhe udlale indima enkulu ekuqedeni limpi.
Uthe uhulumende wakhe unikeze uTrump imininingwane yonke ephathelane laloludaba njengoMongameli omutsha ozaqalisa umsebenzi ngoMvulo.
Kodwa uTrump laye wethule umbiko esithi nguye odale ukuthi iHamas leIsrael bavumelane. Olandela ezombusazwe zeMelika uMnu Tim Muringai utshele iStudio 7 ukuthi bobabili uBiden loTrump kumele bathole imiklomelo ngaloludaba.
UMongameli Biden usuka nje embusweni ngoMvulo ngemva kokuphatheka kwezombusazwe okweminyaka edlula amatshumi amahlanu, 50 years. Wadonsa iminyaka eminengi enguSenator.
Olandela ezombusazwe uMnu Den Moyo uthi kunengi uBiden azakhunjulwa ngakho.
UBiden ugqibe umbiko wakhe ngokubonga abantu beMelika ngethuba lokukhokhela abamupha lona.
Your browser doesn’t support HTML5
Udaba Siluphiwa nguNtungamili Nkomo